– Almaty oblysynda Jetisýdyń jaýhary, elimizdegi jeti keremettiń birine balanǵan Kólsai kólderi bar. Ulttyq park aýmaǵyndaǵy eń shuraily jerler kezinde jekeniń qolyna ótip ketken. Basynda bul jerler Aýyl sharýashylyq maqsatqa, shabyndyq jáne jaiylymǵa dep berilgen.
Endi kásipkerler qonaqúi, bassein, dámhana salyp jatyr. Málimet boiynsha birde bireýiniń qurylys salýǵa ruqsat qaǵazdary joq.
Jer maqsatsyz paidalanylýda. Al Ulttyq park aýmaǵynda kapitaldy qurylys júrgizýge bolmaidy degen erejeni eshkim elemeidi.
Quzyrly oryndar da ony tekserýge, shara qoldanýǵa qulyqsyz.
Resmi málimet boiynsha sońǵy bir jarym jylda «Kólsai» kólderine jarty million týrist kelipti. Kóldiń ainalasynda bos jer joq. Ainalanyń bárine shamamen úsh júzdei kiiz úi men tamaqtaný shatyrlary tigilgen. Eshqaisysynda dárethana joq. Taýly aimaqta káriz júiesi bolmaǵandyqtan shaiyndy sýlar men nájis jerge sińip jatyr. Septik, assenizator degen atymen joq.
Osylaisha tumsa tabiǵattyń ekologiiasy buzylýda. Qala berdi tútini býdaqtaǵan kólikter kóldiń basyna deiin barady.
Al, Almatydaǵy Medeý men Shymbulaq shatqaldaryna tek elektromobilderdiń kirýine ǵana ruqsat berilgen.
Ekeýiniń de Ulttyq park degen mártebesi bar. Sondyqtan Kólsaiǵa da sondai shekteý engizbesek, endi 5-6 jylda elimizdegi eń kórikti jerden aiyrylyp qalamyz.
Biz syrtqa ketken aktivterdi qaitaramyz dep jańa zań qabyldadyq. El ishinde de kezinde qoldy bolǵan, arzan baǵaǵa satylǵan, zańsyz ózgeniń ieligine ótken osyndai shuraily, erekshe qorǵaýdy qajet etetin jerler bar.
Arnaiy komissiia qurylyp solarǵa keshendi tekserý kerek.
Osy rette jalǵyz Kólsai emes barlyq Ulttyq park aýmaǵyndaǵy satylǵan, uzaq jylǵa jalǵa berilgen barlyq jerlerdiń zańdylyǵyn tekserip memleket menshigine qaitarý qajet dep sanaimyn, – dedi depýtat Qasqaraýov.
