Polısıanyń málimetinshe, zańǵa saı júrgizýshi kólik tizgininde otyrǵanda telefondy qolyna almaı ǵana qoldana alady.

Júrgizýshi telefondy qolynda ustasa, onyń qoldanylýy quqyqbuzýshylyq sanalady:

• sóılesý;
• mátin terý;
• habarlama oqý;
• qosymshalardy paıdalaný;
• daýys habarlamasyn jazý, foto nemese vıdeo túsirý.

Vedomstvo ókilderi telefondy qolda ustaýǵa tipti qysqa ýaqytqa toqtaǵan kezde de bolmaıtynyn atap ótti. Mysaly, baǵdarshamda nemese kepteliste turǵan sátte de júrgizýshi kólikti basqaryp otyr dep esepteledi.

Polısıa taksı júrgizýshileri men kýrerler úshin de talap birdeı ekenin aıtty. Telefondy tek arnaıy ustaǵyshqa bekitip, navıgator retinde paıdalanýǵa ruqsat bar. 

Sonymen qatar, telefondy qolda ustamaı paıdalanýǵa múmkindik beretin zamanaýı baılanys quraldaryna tyıym salynbaǵan. Olardyń qatarynda:

• hands-free júıesi;
• Bluetooth;
• kóliktegi mýltımedıalyq júıeler;
• daýys arqyly basqarý bar.

Kameralar mundaı quqyqbuzýshylyqtardy qalaı tirkeıtini naqty aıtylmaǵan. Mysaly, telefon qulaqqa taqalmasa da, qolda tursa, júıe ony anyqtaı ma, álde joq pa, belgisiz. Sondaı-aq, qoldaǵy zat naqty telefon ekenin qalaı aıyratyny da túsindirilmegen.

Buǵan qosa, tehnıkalyq qatelik bolýy múmkin be degen suraq ta ashyq kúıinde qalyp otyr. Máselen, adam qulaǵyna jaı ǵana qolyn tıgizip kele jatsa, júıe ony qalaı baǵalaıtyny belgisiz.

Bul jaıttarǵa qatysty memlekettik organdar naqty jaýap bermegen.