Kókshetaý qalasyndaǵy "Naberejnaia" jaǵajaiyn salýǵa bólingen qomaqty qarajatty jymqyrdy degen kúdikpen birqatar laýazymdy tulǵalar ustalyp, ýaqytsha ustaý izoliatoryna qamaldy. Bul týraly Aqmola oblysynyń arnaiy prokýrorlary habarlady, dep habarlaidy Dalanews.kz.
Atap aitqanda, 2021 jyly Kókshetaýdaǵy eski áýejaidan Qan ortalyǵyna deiin sozylatyn jaǵajai qurylysyn júrgizý úshin bólingen 170 mln teńgeden astam qarajattyń maqsatsyz jumsalǵany belgili boldy. Tergeý barysynda qala ákimdiginiń turǵyn úi-kommýnaldyq sharýashylyq bóliminiń burynǵy basshysy, tehnikalyq qadaǵalaý júrgizgen "M-Stroi Proekt" JShS jáne merdiger "PavlodarEnergoMontaj" JShS basshylarynyń bul iske qatysy bary anyqtaldy.
Qylmystyq is QR Qylmystyq kodeksiniń 189-baby 4-bóligi ("Asa iri kólemde senip tapsyrylǵan bóten múlikti iemdenip alý nemese talan-tarajǵa salý") boiynsha qaralyp jatyr. Bul bap boiynsha kináli dep tanylǵan jaǵdaida múlki tárkilenip, 12 jylǵa deiin bas bostandyǵynan aiyrylýy múmkin.
Tergeý barysynda zańsyz jolmen alynǵan múlik te tabyldy: atap aitqanda, Astana qalasynan 95 mln teńgege baǵalanǵan kommertsiialyq jyljymaityn múlik anyqtalǵan. Prokýrorlardyń málimetinshe, jobanyń keibir jumystary Atbasar qalasyndaǵy ózge nysannan jymqyrylǵan qarjy esebinen oryndalǵan.
Sonymen qatar, bir kúdiktige qatysty QR QK 218-baby 3-bóligi ("Qylmystyq jolmen alynǵan aqshany nemese ózge múlikti zańdastyrý") boiynsha da is qozǵaldy. Bul bap boiynsha da 10 jylǵa deiin bas bostandyǵynan aiyrý jáne múlkin tárkileý qarastyrylǵan.
Qazirgi ýaqytta qylmystyq is aiaqtalýǵa jaqyn. Sońǵy sheshimdi sot shyǵaratyn bolady.
