Germaniia Ýkrainaǵa jańa áskeri kómek paketin jariialady, onyń jalpy kólemi 1 mlrd eýrodan asady, dep habarlaidy dalanews.kz.
Germaniia kantsleri Fridrih Merts bul týraly Kievke jasaǵan jumys sapary barysynda málimdedi.
Jańa paketke Ýkrainaǵa alys qashyqtyqqa ushatyn qarý-jaraq, jaýyngerlik drondar jáne spýtniktik jabdyqtar jetkizý, sondai-aq ustap qalýshy drondardy birlesip óndirý jobalary kiredi.
Berlin sonymen qatar Ýkrainaǵa shamamen 350 mln eýro kóleminde energetikalyq qoldaý kórsetpek. Bul qarajat generatorlar, transformatorlyq qosalqy stantsiialar jáne soqqydan zaqymdanǵan energetikalyq nysandardy qalpyna keltirýge qajetti jabdyqtardy satyp alýǵa baǵyttalady. Osy kómekti qosa eseptegende, Germaniianyń jańa qoldaý paketiniń jalpy kólemi shamamen 1,35 mlrd eýrony quraidy.
Merts Germaniianyń Ýkrainaǵa áskeri jáne azamattyq qoldaýdy jalǵastyratynyn aitty. Onyń sózinshe, eki el qorǵanys salasyndaǵy yntymaqtastyqty keńeitip, birlesken óndiristi damytýǵa nietti.
Atap aitqanda, Germaniia men Ýkraina drondar, 1000 shaqyrymnan astam qashyqtyqqa ushatyn zymyrandar jáne spýtniktik tehnologiialar boiynsha birlesken jobalardy júzege asyrýdy josparlap otyr
Ýkraina prezidenti Vladimir Zelenskiidiń aitýynsha, Germaniia kantsleriniń sapary barysynda 15 kelisim men basqa da qujatqa qol qoiylǵan. Olardyń jalpy quny 8,5 mlrd eýrodan asady.
Germaniia Ýkrainaǵa áskeri kómek kórsetip otyrǵan Eýropadaǵy negizgi memleketterdiń biri sanalady. Jańa paket Kievke energetikalyq infraqurylymǵa jasalǵan shabýyldar kúsheigen jáne qys maýsymy jaqyndaǵan kezeńde jariialandy.
