Qazaqstanda jumys berýshi jalaqyny keshiktirgen árbir kún úshin qyzmetkerge ósimpul tóleýge mindetti. Iaǵni, bereshekti jai ǵana óteý jetkiliksiz, dep habarlaidy dalanews.kz.
Eńbek kodeksiniń 113-babyna sáikes, qyzmetkerge tek eńbekaqysy ǵana emes, jalaqy keshiktirilgen búkil kezeń úshin ósimpul da tólenýi tiis. Bul talap jalaqyny ýaqytynda tólemegen jumys berýshilerge qosymsha qarjylyq jaýapkershilik júkteidi.
Ósimpul mólsheri tólem jasalǵan kúngi Ulttyq banktiń bazalyq mólsherlemesiniń 1,25 eselengen kólemi negizinde esepteledi. Ol jalaqy tólenýi tiis kúnnen keiingi kúnnen bastap naqty tólem júrgizilgen kúnge deiin, demalys jáne mereke kúnderin qosa alǵanda, barlyq kúntizbelik kún úshin esepteledi.
Jalaqy qashan tólenýi kerek?
Qazaqstan zańnamasyna sáikes, jalaqy aiyna keminde bir ret jáne kelesi aidyń 10-kúninen keshiktirilmei tólenýi tiis. Naqty tólem kúni eńbek nemese ujymdyq shartta kórsetiledi. Eger belgilengen kún demalys nemese mereke kúnine sáikes kelse, jalaqy aldyn ala tólenýi qajet. Sonymen qatar, shartta kórsetilgen merzim zańdaǵy sońǵy merzimnen erterek bolsa, jumys berýshi tólemdi keiinge qaldyra almaidy.
Qaryz ben ósimpuldy qalai talap etýge bolady?
Aldymen qyzmetker jumys berýshiden jalaqy boiynsha bereshekti jáne ósimpuldy tóleýdi talap ete alady. Eger másele sheshilmese, jumys berýshi ornalasqan óńirdegi Memlekettik eńbek inspektsiiasy komitetiniń aýmaqtyq departamentine nemese eOtinish platformasy arqyly shaǵym berýge bolady.
Ótinishke eńbek qatynastaryn jáne tólemniń júrgizilmegenin dáleldeitin qujattardy qosa tirkeý usynylady. Olardyń qatarynda eńbek sharty, esep aiyrysý paraqtary, bank úzindileri, buiryqtar jáne basqa da qujattar bolýy múmkin.
Inspektorlar tekserý júrgizip, jalaqy boiynsha qaryz rastalǵan jaǵdaida, jumys berýshige zań buzýshylyqty joiý týraly mindetti nusqama beredi. Onyń oryndalýy baqylaýda bolady.
Jumys berýshige aiyppul da salynady
Jalaqyny ýaqytynda tólemegeni nemese ósimpuldy eseptemei, tólemegeni úshin jumys berýshilerge ákimshilik jaýapkershilik qarastyrylǵan.
Aiyppul mólsheri:
- laýazymdy tulǵalarǵa – 30 AEK;
- shaǵyn biznes sýbektileri men kommertsiialyq emes uiymdarǵa – 60 AEK;
- orta biznes sýbektilerine – 100 AEK;
- iri biznes sýbektilerine – 150 AEK.
Mamandardyń aitýynsha, ósimpul men ákimshilik aiyppuldyń aiyrmashylyǵyn eskergen jón. Ósimpul qyzmetkerge tólense, ákimshilik aiyppul memleket paidasyna óndirilip alynady.
