Kókshetaý qalasynda agroónerkásip kesheni sýbektilerine beriletin memlekettik sýbsidiialardy jymqyrý isi boiynsha úkim shyǵaryldy, dep habarlaidy Dalanews.kz.
Tergeýdi QMA Aqmola oblysy boiynsha departamenti júrgizdi.
Eki jyl boiy «MolProdJarkain» ÁKK direktory A.S. Efimkina jáne «Rassvet» sharýa qojalyǵynyń basshysy A.V. Maslov sút jáne ony tereń óńdeý ónimderiniń óndirisin arzandatýǵa arnalǵan sýbsidiialardy zańsyz alǵan.
«Rassvet» sharýa qojalyǵynda málimdelgen kólemde sút óndirýge jetkilikti mal basy bolmaǵan. Soǵan qaramastan elektrondyq shot-faktýralar aqparattyq júiesinde «MolProdJarkain» ÁKK-ne 3 mln kg-nan astam shiki sút jetkizilgeni týraly jalǵan qujattar rásimdelgen.
Osy qujattar negizinde sútti sary mai men qatty irimshikke óńdeý týraly esepter jasalyp, ýákiletti organ ótinimderdi maquldaǵannan keiin qarajat kásiporynnyń esepshotyna aýdarylǵan.
Memleketke keltirilgen jalpy zalal 152 mln teńgeni qurady.
Budan bólek, alynǵan sýbsidiialardyń bir bóligi jasyrý maqsatynda Efimkinanyń týysynyń depozittik shotyna aýdarylǵan. Keiin bul qarajatqa jalǵa berilip, tabys tabý úshin paidalanylǵan mobildi ǵimarat satyp alynǵan.
Tergeý barysynda 6 jer ýchaskesine, 4 páterge, 11 avtokólikke, mobildi ǵimaratqa jáne óndiristik nysanǵa tyiym salyndy.
Sot úkimimen A.V. Maslov pen A.S. Efimkina 6 jyl 4 ai merzimge bas bostandyǵynan aiyryldy. Mobildi ǵimarat memleket kirisine tárkilendi.
Qalǵan múlikke salynǵan tyiym azamattyq talap tolyq oryndalǵanǵa deiin saqtalady.
Úkim zańdy kúshine endi.
