Kókshetaýda adam ólimine ákep soqqan jol apatynan keiin kólik júrgizgen áieldiń kúieýine 5 jylǵa deiin bas bostandyǵynan aiyrý jazasy taǵaiyndalýy múmkin, dep habarlaidy dalanews.kz.
Bul týraly Májilis dálizinde ishki ister ministriniń orynbasary Sanjar Ádilov málimdedi. Onyń aitýynsha, kólik júrgizgen áielge qatysty Qylmystyq kodekstiń 345-baby boiynsha is qozǵalǵan. Sot ony úiqamaqqa alý týraly sheshim shyǵarǵan.
Sonymen qatar, kólikti zańsyz basqarýǵa bergen adamǵa qatysty bólek qylmystyq is tirkelgen. Tergeý málimetinshe, ol - kúdiktiniń kúieýi. Oǵan Qylmystyq kodekstiń 349-baby boiynsha aiyp taǵylyp otyr. Bul bap boiynsha 5 jylǵa deiin bas bostandyǵynan aiyrý jazasy kózdeledi.
Aita keteiik, qaiǵyly oqiǵa 9 mamyrda Kókshetaýda bolǵan edi.
