Memleket basshysy Qasym-Jomart Toqaev Qazaqstannyń atom energetikasy men klimat ózgerisi jónindegi ustanymyn jariialap, óńirlik yntymaqtastyqtyń mańyzyn erekshe atap ótti, dep habarlaidy Dalanews.kz.
“Álemdegi ýran qorynyń 40 paiyzy Qazaqstannyń enshisinde. Sondyqtan elimiz atom energetikasyn damytýdy ulttyq strategiianyń basym baǵyty retinde qarastyrady.
Alaida klimat daǵdarysy sheshilmei, eshqandai ornyqty damý bolmaidy. Ortalyq Aziia – planetadaǵy klimat ózgeristerine osal óńirlerdiń biri. Munda ǵalamdyq jylyný deńgeii álemdegi ortasha kórsetkishpen salystyrǵanda eki ese joǵary.
Atalǵan qiyndyqtardy eńserý úshin óńirlik turǵydan úilestirilgen, pragmatikalyq baǵyttaǵy klimat kún tártibin ilgeriletýge beiilmiz. Onyń aiasynda elimiz birqatar halyqaralyq uiymǵa múshe bolyp, kelisimderge qosyldy. Kelesi jyly Qazaqstan BUU-men birge Óńirlik ekologiialyq sammitin ótkizedi. Bul alań Ortalyq Aziia elderiniń strategiiasyn jahandyq maqsatpen ushtastyrýdy kózdeidi”, — deidi ol.
Prezidenttiń málimetinshe, Qazaqstan osy baǵytta birneshe halyqaralyq uiymdarǵa múshe bolyp, tiisti kelisimderge qosylǵan.
“Qazaqstan ózara qurmet pen aimaqtyq yqpaldastyqty arqaý etken Ortalyq Aziianyń turaqtylyǵy berik, yntymaǵy bekem, bolashaǵy aiqyn bolǵanyn qalaidy.
Eki ai buryn BUU Bas Assambleiasy Almatyda Ortalyq Aziia men Aýǵanstan úshin Ornyqty damý maqsattary jónindegi BUU-nyń aimaqtyq ortalyǵyn qurý týraly qarardy resmi túrde qabyldady. Bul – bizdiń kópjaqty damýǵa úles qosqan mańyzdy jetistigimiz. Atalǵan ortalyq birlesken jobalarǵa qoldaý kórsetip, tehnikalyq saraptamalardy qamtamasyz etedi jáne halyqaralyq yntymaqtastyqty úilestiredi”, — dep qosty ol.
