QR Joǵarǵy sotynyń tóraǵasy
Qaırat Mámıdiń nazaryna!
Qurmetti Qaırat ata!
Men Káýker Janerke Janbolatqyzy 2017 jyldyń 27 aqpanynda dúnıege keldim. Men dúnıege kelmeı turyp, ıaǵnı ótken 2016 jyldyń tamyz aıynyń 3-i kúni ákem kisi qolynan qaza tapty. Basynan qatty tıgen soqqynyń kesirinen ákeshim Ábdikerimov Janbolat Káýkeruly bu dúnıemen qoshtasyp kete bardy.
Sheshem qaldy, zar eńirep. Ájem men atam qaldy, qarashańyraqtyń ıesi sanalatyn uldarynyń qabirin qushaqtap. Mektep esigin bıyl ǵana ashqan ápkem qaldy, ákesiz jetim bolyp. Ákemniń baýyrlary qaldy, «qanǵa-qan, janǵa-jan» dep inileriniń kegin ne qaıtararyn, ne qaıtarmasyn bilmeı... Men ol kezde dúnıe esigin áli ashpasam da, anamnyń qursaǵynda jatyp, sol bir aýyrtpalyqtyń bárin tula boıymmen sezinip jattym.
Qaırat ata, qazaq jetimin jylatpaǵan el edi ǵoı. Bizdi jylatyp, ákesiz jetimek etken Kerimjan Rústem atty azamat qazir bostandyqta «gólaıttap» júr. Meniń ákemniń sonda suraýy bolmaǵany ma? Bireýdiń malyn óltirse de, jazaǵa tartatyn zańymyz bar edi ǵoı. Meniń ákemniń mal ekesh mal sekildi de quny bolmaǵany ma? Osyny oılasam, jan-dúnıem titirkenip, tula-boıym qalshyldap ketedi. Dúnıe esigin áli ashyp úlgermegen sábıdiń júregine jara salý – Táýelsiz, damyǵan, álemdegi 30 eldiń sapyna qosylýǵa talpynǵan memleket úshin uıat emes pe? Bir úıli jandy qaıǵynyń teńizine batyrǵan qylmyskerdi bostandyqqa jibere salý búkil qazaq eli azamattarynyń ashýyn týǵyzaryna bek senemin. Sondyqtan da, Sizge hat jazyp, kómek qolyńyzdy sozýyńyzdy ótinip suraımyn.
Qaırat ata! Sizdiń men sekildi nemereńiz bar ma? Qudaı onyń betin ary qylsyn, sol nemereńiz meniń kúıimdi keship jatsa, tynysh uıyqtar alar ma edińiz?. «Ár qazaq – meniń jalǵyzym» deıtin ulttyń uly emes pe edik?!. Demek, men Sizdiń de nemereńizbin. Meniń sózimdi jerge tastaı kórmeńizshi.
Ákem Ábdikerimov Janbolat Káýkeruly kisi qolynan qaza tapty. Qaraǵandy oblysyna qarasty Balqash qalalyq soty qylmysty isti qarap, Kerimjan Rústemdi 106 babtyń 3-tarmaǵymen (Densaýlyqqa qasaqana aýyr zıan keltirý) qylmysty dep taýyp, 9 jylǵa bas bostandyǵynan aıyrdy. Kerimjan Rústemniń zańgerleri bul jazamen kelispeı, Qaraǵandy oblysynyń sotyna júginedi. Oblystyq sot Balqash qalalyq sottyń úkimin ózgertpeı kúshinde qaldyrady. Osylaısha ákemdi óltirgenderdiń qylmystyq isi Joǵarǵy sotqa deıin jetedi. Nege ekenin qaıdam, Joǵarǵy sot Kerimjan Rústemniń qylmysyna belgilengen 106 babtyń 3-tarmaǵyn 104-baptyń 1-tarmaǵyna ózgertip (Abaısyzda qazaǵa ushyratý 1. Abaısyzda qazaǵa ushyratý – úsh jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady), sosyn Elbasynyń táýelsizdiktiń 25 jyldyǵyna jarıalaǵan Raqymshylyǵyna ilip, sot zalynan bosatyp jiberdi.
Qurmetti Qaırat ata! Elbasymyzdyń raqymshylyǵy qylmyskerge buıyryp, bizge buıyrmaı ma? Bizdi tóbemizden tas túskendeı eseńgiretip tastaǵan bul úkimniń sońy nege aparatynyn ózińiz oılap kórińizshi.
Ájem Kúlzıpash Seıitova
Birinshiden, ájemdi aıaımyn. Ákemniń qazasynan keıin densaýlyǵy kúrt nasharlap ketip edi. Joǵarǵy sottyń sheshiminen keıin tipti jaǵdaıy tómendep, óz aıaǵymen júrgen ájem múgedek arbasyna tańylyp qaldy.
Atam Ábdikárimov Káýker
Ekinshiden, atam «balalary (ákemniń baýyrlary) «kek qýamyn» dep bir bálege ushyrap qala ma dep jany shyǵardaı shyryldap júr.
Úshinshiden, ákemniń baýyrlary Qazaqstan musylmandar dinı basqarmasyna baryp, qazaqy jolmen «qanǵa qan, janǵa jan» dástúrin jańǵyrtýǵa pátýa surady. Múftıat pátýá berýden úzildi-kesildi bas tartypty. Munyń sońy taǵy da qylmysqa jalǵasyp ketse, kim jaýapty?
Anam Ábdikerimova Ǵalıa Batyrjanqyzy men ákem Ábdikárimov Janbolat Káýkeruly
Tórtinshiden, otyz jasynda azamatynan aırylyp, jesir qalǵan sheshem Ábdikárimova Ǵalıa Batyrhanqyzy zań jolymen ádildik tappasa, joǵarǵy sottyń aldyna baryp ózin-ózi órteýi ábden múmkin ǵoı. Mundaı jaǵdaı bola qalsa, ákemniń isin qaraǵan Joǵarǵy sottyń qyzmetkerleri jaýapty bolmaı ma?
Káýker Zere Janbolatqyzy
Besinshiden, mektep tabaldyryǵyn bıyl attaǵan Káýker Zere Janbolatqyzy men dúnıege jańa kelgen meniń keıbir sheneýnikterdiń kesirinen kúshtik qurylymdarǵa degen keri kózqarasymyz qalyptasyp ketse, bul Táýelsiz Qazaqstan úshin eń úlken qaýip emes pe? Bir úıli jandy baǵyp otyrǵan ákemniń janynyń keıbir sýdıalarǵa kók tıyndyq quny joq shyǵar. Biraq, keýdesinde shyryldaǵan jany bar jetimekterdiń kóz jasynyń qunynyń qandaı bolatynyn Elbasymyz jaqsy biledi.
Qurmetti Qaırat ata!
Ákemniń nurly júzin ómirde bir ret kóre almaǵan meniń taǵdyrymdy eshbir balaǵa Qudaı kórsetpese eken. Sol úshin de Elbasynyń halyqqa jasaǵan jaqsylyǵyn, raqymshylyǵyn óz múddelerine paıdalanyp, bizdi jylatqandarǵa shara qoldanýyńyzdy suraımyz.
Qazaqstan zańy barlyq adamǵa birdeı. Biz ol zańǵa qurmet etemiz. Qurmet etkendikten de, Sizge hat jazyp, kómek surap otyrmyz.
Ákemdi óltirgen adam bostandyqta júrgen kezde Táýelsiz Qazaqstan jerin basyp júrý men úshin óte qorqynyshty, úreıli.
Tula-boıymdy bılegen osy úreıdi seıiltińizshi, Qaırat ata!
Mynaý - menmin!
Sálemnen Káýker Janerke Janbolatqyzy
Derekkóz: Abai.kz
