Qazaqstan Respýblikasy Básekelestikti qorǵaý jáne damytý agenttiginiń Almaty q. boiynsha departamenti Kinopark – Kinoplexx Theatres kinoteatrlar jelisiniń áreketterinen ústem jaǵdaidy teris paidalaný belgilerin anyqtady, dep habarlaidy Dalanews.kz.
Atalǵan jelide otandyq kinoóndirýshilerge mindetti túrde jarnama biýdjetin tóleý talaby qoiylǵan, al atalmysh tólem jasalmaǵan jaǵdaida filmder kinoteatrlarda kórsetilimge jiberilmegen. Mundai talaptar básekelestikti shektep, naryq sýbektileriniń zańdy quqyqtaryn buzǵan, kinoóndirýshilerdiń kinoprokat naryǵyna kirýine kedergiler jasap, otandyq kinematografiianyń damýyn tejegen.
Osyǵan bailanysty Kinopark – Kinoplexx Theatres kompaniiasyna Qazaqstan Respýblikasynyń básekelestikti qorǵaý salasyndaǵy zańnamasyn buzý belgileriniń bar ekendigi týraly habarlama joldandy.
Habarlamany qaraý nátijesinde anyqtalǵan buzýshylyqtar joiyldy. Atap aitqanda, mindetti jarnamalyq shyǵyndardy júkteý tájiribesi toqtatylyp, filmderdi prokatqa shyǵarý úshin talap etilgen «kirý tólemderi» alyp tastaldy.
Sonymen qatar, habarlamany oryndaý aiasynda qazirgi ýaqytta filmderdi relizder kestesine engizýdiń, seanstar kestesin ózgertýdiń, filmderdiń prokatta bolý merzimderin aiqyndaýdyń, sondai-aq olardy kórsetilimnen alý sharttarynyń biryńǵai, ashyq jáne kemsitýsiz tártibin belgileitin jariia reglament ázirlenýde.
Qabyldanǵan sharalar naryqtyń barlyq qatysýshylary úshin teń jaǵdailardy qamtamasyz etýge, kinoprokat rásimderiniń ashyqtyǵyn arttyrýǵa jáne otandyq kinoindýstriianyń damýyna qolaily orta qalyptastyrýǵa baǵyttalǵan.
