قازاقستان رەسپۋبليكاسى باسەكەلەستىكتى قورعاۋ جانە دامىتۋ اگەنتتىگىنىڭ الماتى ق. بويىنشا دەپارتامەنتى Kinopark – Kinoplexx Theatres كينوتەاترلار جەلىسىنىڭ ارەكەتتەرىنەن ۇستەم جاعدايدى تەرىس پايدالانۋ بەلگىلەرىن انىقتادى، دەپ حابارلايدى Dalanews.kz.

اتالعان جەلىدە وتاندىق كينووندىرۋشىلەرگە مىندەتتى تۇردە جارناما بيۋدجەتiن تولەۋ تالابى قويىلعان، ال اتالمىش تولەم جاسالماعان جاعدايدا فيلمدەر كينوتەاترلاردا كورسەتىلىمگە جىبەرىلمەگەن. مۇنداي تالاپتار باسەكەلەستىكتى شەكتەپ، نارىق سۋبەكتىلەرىنىڭ زاڭدى قۇقىقتارىن بۇزعان، كينووندىرۋشىلەردىڭ كينوپروكات نارىعىنا كىرۋىنە كەدەرگىلەر جاساپ، وتاندىق كينەماتوگرافيانىڭ دامۋىن تەجەگەن.

وسىعان بايلانىستى Kinopark – Kinoplexx Theatres كومپانياسىنا قازاقستان رەسپۋبليكاسىنىڭ باسەكەلەستىكتى قورعاۋ سالاسىنداعى زاڭناماسىن بۇزۋ بەلگىلەرىنىڭ بار ەكەندىگى تۋرالى حابارلاما جولداندى.

حابارلامانى قاراۋ ناتيجەسىندە انىقتالعان بۇزۋشىلىقتار جويىلدى. اتاپ ايتقاندا، مىندەتتى جارنامالىق شىعىنداردى جۇكتەۋ تاجىريبەسى توقتاتىلىپ، فيلمدەردى پروكاتقا شىعارۋ ءۇشىن تالاپ ەتىلگەن «كىرۋ تولەمدەرى» الىپ تاستالدى.

سونىمەن قاتار، حابارلامانى ورىنداۋ اياسىندا قازىرگى ۋاقىتتا فيلمدەردى رەليزدەر كەستەسىنە ەنگىزۋدىڭ، سەانستار كەستەسىن وزگەرتۋدىڭ، فيلمدەردىڭ پروكاتتا بولۋ مەرزىمدەرىن ايقىنداۋدىڭ، سونداي-اق ولاردى كورسەتىلىمنەن الۋ شارتتارىنىڭ ءبىرىڭعاي، اشىق جانە كەمسىتۋسىز ءتارتىبىن بەلگىلەيتىن جاريا رەگلامەنت ازىرلەنۋدە.

قابىلدانعان شارالار نارىقتىڭ بارلىق قاتىسۋشىلارى ءۇشىن تەڭ جاعدايلاردى قامتاماسىز ەتۋگە، كينوپروكات راسىمدەرىنىڭ اشىقتىعىن ارتتىرۋعا جانە وتاندىق كينويندۋستريانىڭ دامۋىنا قولايلى ورتا قالىپتاستىرۋعا باعىتتالعان.