Ýkrainanyń Kiev oblysyna jasalǵan reseilik shabýyldardan úsh bala men bir áiel qaza tapty, dep habarlaidy dalanews.kz.
«Osylaisha, Kiev oblysynda qaza tapqandar sany tórt adamǵa jetti — úsh bala jáne bir áiel», — dep habarlady Kiev oblystyq áskeri ákimshiliginiń basshysy Timýr Tkachenko.
Fastov aýdanynda reseilik dron jeke turǵyn úige soqqy bergen. Sonyń saldarynan áiel jáne onyń úsh jastaǵy egiz balalary — qyz ben ul qaza tapqan.
Vyshgorod aýdanyndaǵy bólek shabýyl kezinde jaralanǵan taǵy bir bala aýrýhanada kóz jumǵan. Osydan keiin oblystaǵy shabýyldardan qaza tapqandar sany tórt adamǵa jetken.
Kiev oblystyq áskeri ákimshiliginiń málimetinshe, aimaqtaǵy shabýyldar bir táýlikten astam ýaqytqa sozylǵan. Bes aýdanda 31 nysan zaqymdanǵan.
Fastov aýdanynda eń kóp qiraý tirkelip, turǵyn úiler, óndiristik jáne sharýashylyq ǵimarattar, aýyl sharýashylyǵy kásipornynyń aýmaǵy men 17 kólik búlingen. Vyshgorod aýdanynda tórt nysan, onyń ishinde eki jeke úi, kásiporyn ǵimaraty jáne bilim berý nysany zaqymdanǵan.
Reuters málimetinshe, Kiev pen oǵan jaqyn aýdandarda drondardyń shabýyly kúndiz de jalǵasqan. Resei biligi bul soqqylarǵa qatysty túsinikteme bermegen.
