QR Ulttyq Banki Berlınde ótken World Money Fair halyqaralyq aqsha kórme-konferensıasynda ÚKI sıfrlyq ınvestısıalyq monetasyn tanystyrdy. Oǵan qatysýdaǵy negizgi maqsat – "ÚKI sıfrlyq ınvestısıalyq monetasy" jobasyn álemdik deńgeıde tanystyrý, sonyń aıasynda ony iske qosý jáne júzege asyrý isindegi negizgi erekshelikterdi usyný, dep habarlaıdy Dalanews.kz.
"Halyqaralyq sarapshylar jobanyń ınovasıalyq sıpatyn, qarjylyq saýattylyqqa negizdelgen baǵytyn, sondaı-aq Qazaqstan teńge saraıy shyǵarǵan ÚKI altyn ınvestısıalyq monetasynyń sapasy men eksklúzıvti dızaınyn joǵary baǵalady. Monetanyń novatorlyq konsepsıasyn Ulttyq Banktiń dızaınerleri ázirlep shyqty", delingen Ulttyq Bank habarlamasynda.
Bul monetalar Astana International Exchange (AIX) bırjasynyń "TABYS" mobıldi qosymshasy arqyly satylady. ÚKI sıfrlyq ınvestısıalyq monetasy týraly tolyǵyraq aqparatty Ulttyq Banktiń saıtynan jáne YouTube arnasynan bile alasyz.
World Money Fair – halyqaralyq moneta qaýymdastyǵyn jyl saıyn biriktiretin álemdegi eń iri nýmızmatıkalyq alań. Oǵan ortalyq bankterdiń, moneta saraılarynyń, moneta jabdyqtaryn óndirýshi kompanıalardyń ókilderi, dızaınerler, sondaı-aq iri nýmızmatıkalyq basylymdardyń mamandary qatysady. Ulttyq Bank bul sharaǵa 2000 jyldan beri jyl saıyn qatysyp keledi.
ÚKI ınvestısıalyq monetasy – altyn (Au 999,9), nomınaly 100 teńge, salmaǵy 31,1 gram.
