Depýtattar salyq reformasyn áli de qyzý talqylap jatyr. Bul týraly Májilis depýtaty Ashat Aimaǵambetov málimdedi, – dep habarlaidy Dalanews.kz.
Búgin Qoǵamdyq palatada salyq máselesi taǵy talqylanǵan.
"Taqyryp kúrdeli. Pikirler ártúrli, keide tipti qarama-qaishy. Pikir alshaqtyǵyna qaramastan, bir nárseni atap ótkim keledi: Ulttyq ekonomika jáne Qarjy ministrliginiń ókilderi kásibi, dáleldi jáne sabyrly ustanym kórsetip otyr. Iá, kei sátterde emotsiiaǵa berilip ketetin sátter de bolady - bul qalypty. Óitkeni sóz halyqtyń jaǵdaiy týraly bolyp otyr. Bastysy — talqylaý mádenietti, kásibi deńgeide ótip jatyr. Bul qýantady", - dedi ol.
Aimaǵambetovtiń sózinshe, kún tártibinde áli de ózekti usynystar bar:
- jeke adamdar arasyndaǵy kartadan kartaǵa aýdarymdarǵa NQS-ty alyp tastaý;
- dári-dármek, meditsinalyq qyzmetter, kitaptar, baspa isi, balalar animatsiiasy siiaqty áleýmettik mańyzdy baǵyttardy NQS-tan bosatý;
- iri bizneske beriletin negizsiz salyqtyq jeńildikterdi qysqartý.
Eske salaiyq, osy sársenbide Májiliste jańa Salyq kodeksiniń jobasy talqylandy. Premer-ministrdiń orynbasary – ulttyq ekonomika ministri Serik Jumanǵarin joba byltyr qyrkúiekten bastap qaralyp jatqanyn, biyl oǵan tujyrymdamalyq túzetýler engizilgenin málimdedi.
Jumanǵarinniń sózinshe, qosylǵan qun salyǵy 16% bolady. Ekinshi – qosylǵan qun salyǵynyń shegi. Qosylǵan qun salyǵy boiynsha shek 40 mln. teńge mólsherinde belgilenedi.
