Kentaý qalasynda 2025 jyly jalpy quny 10,3 mlrd teńgeni quraityn 16 joba iske asyrylmaq. Nátijesinde 492 adam turaqty jumyspen qamtylady dep kútilýde. Onyń ishinde, ónerkásip salasynda 4 iri joba jyl sońyna deiin jumysyn bastaidy. Bul týraly Kentaý qalasynyń ákimi Jandos Tasov brifingte málimdedi,- dep habarlaidy Dalanews.kz
«Biyl ashylatyn tórt iri jobamyzdyń ekeýi arnaiy ekonomikalyq aimaqta, qalǵan ekeýi indýstrialdy aimaqta ornalasqan. Atap aitar bolsaq, «KentauRedStar»JShS-i – kirpish óndirisimen ainalysady. 2023 jyly qurylysy bastalǵan nysannyń joba quny - 1,5 mlrd teńge. Biyl mamyr aiynda iske qosylǵan zaýytta 80 adam turaqty jumyspen qamtylǵan. Óndiris orny jylyna 45 mln dana kirpish óndirýge qaýqarly. Budan bólek, «TURAN SHENHUA» JShS-i gaz qazandyqtaryn jáne turmystyq tehnikalalardy óndirýdi qolǵa almaq. 2025 jyldyń qarasha aiynda jumysyn bastaidy dep josparlanǵan óndiris ornynda 120 adamǵa jumys tabylmaq. Joba quny – 2,4 mlrd teńge. Sondai-aq, biyl aiaqtalýy tiis jobalar qatarynda metall buiymdaryn óndirýge baǵyttalǵan «AidarStroiGrýpp» JShS-i jáne «Sapar Qurylys-S» JK metall óndirisi tsehy bar»,- dedi spiker.
Jalpy shaharda 2025 jyldyń 5 aiynda óńirlik ónim kólemi 33,1 mlrd teńgeni qurasa, negizgi kapitalǵa 5,2 mlrd teńge investitsiia tartylǵan. Al, ónerkásip óniminiń kólemi 23,6 mlrd teńgege jetip, oblysta 4-orynǵa jaiǵasty. Sondai-aq, óńdeý ónerkásibinde 20,1 mlrd teńgeniń ónimi óndirilse, aýylsharýashylyǵy salasynda jalpy ónim kólemi 2,1 mlrd teńgeni qurap otyr. Sonymen qatar, qalaǵa qarasty aýmaqtarǵa týristerdi tartý jumystary da qarqyndy. Jyl basynan beri óńirge kelýshiler sany 16,6%-ǵa artqan. Bul kórsetkishti jaqsarta túsý maqsatynda Hantaǵy aýylynda 13 ga jerge 15 zamanaýi modýldi kapsýlalarmen jabdyqtalǵan «KHANTAU» demalys aimaǵyn ashý boiynsha jumystar júrgizilýde. Jyl sońyna deiin aiaqtalýy tiis jobanyń quny 400 mln teńgege baǵalanyp otyr. Sondai-aq, «Qarataý» qoryǵy aýmaǵynan vizit-ortalyǵyn salý kózdelýde. Jalpy aýmaǵy 300 sharshy metr aýmaqty alatyn nysan 100 000 kelýshini kútýge qaýqarly.
Sonymen qatar, óńirdegi qurylys salasynda da jańalyqtar jeterlik. 2025 jyldyń shilde aiynda 5 qabatty 60 páterli áleýmettik-nesielik turǵyn úidiń qurylysy aiaqtalmaq. Sondai-aq, shahardaǵy 288 kópqabatty turǵyn úi qazirgi tańda tolyqtai jańartylǵan. Óńirdegi infraqurylym salasynda da birqatar jumystar atqarylýda. Jalpy búgingi tańdaǵy óńirdiń gazmen qamtylý kórsetkishi 85%-ǵa jetken. Al, Kentaý qalasy men oǵan qarasty aýyldar 100% aýyz sýmen qamtylǵan. Sondai-aq, qala kósheleriniń jaryqtandyrylýy 98%-dy qurasa, óńirdegi qanaǵattanarlyq jaǵdaidaǵy joldar úlesi 87,7%-ǵa jetip otyr.
