Kentaý rýhani jańǵyrýdy bastan ótkerýde
Rýhani jańǵyrý bir-eki kúndik nemese «jasap qoidyq» dep aitatyn naýqandyq jumys emes ekeni anyq. Bul – udaiy, úzilissiz júrgizilip otyrýdy qajet etetin, aýqymy keń baǵdarlama desek bolady.
Kentaý qalasyna qarasty Qarnaq aýylynyń 2000 jyldyq tarihy bar. Túrkistanda turǵan taiqazan da Qarnaqta quiylǵan. Qazaqtyń kemeńger uly M.Áýezovtiń atasy Berdiqoja, Shortanbai Qanaiuly sekildi birtýar azamattarymyz Qarnaqtaǵy medreselerde bilim alǵan. Iaǵni Qarnaq – tarihy tereń ári zertteýdi qajet etetin Qazaqstandaǵy eń kóne aýyldyń biri.
Osy rette Kentaý qalasy ákimdigi Túrkiia, Ózbekstan, Qyrǵyzstan jáne Qazaqstannyń barlyq aimaǵynan ǵalymdardy shaqyrtyp, «Qarnaq – orta ǵasyrdaǵy aǵartýshylyq pen bilim ordasy» atty ǵylymi konferentsiia ótkizdi. Onda tyń derekterge negizdelgen oramdy oilar aityldy. Konferentsiia materialdaryn arnaiy jinaq shyqqanyn bilemiz. Aýyldaǵy myńjyldyq tut aǵashyn, Shammat ishan meshit-medresesi keń kólemde nasihattaldy. Nátijesinde Qarnaq aýylyna kelýshi, tut aǵashy men medreseni kórýshi týristerdiń sany artty.
Sonymen qatar qalaǵa qarasty Hantaǵy aýylyndaǵy, iaǵni Qarataý bókterinde ornalasqan Hannyń taǵy jaiynda da qyzyqty tarihi derekter kóp. Osyny eskere otyryp, aýyldyń tarihyna negizdelgen «Hantaǵy muraty – urpaqqa amanat» atty konferentsiia ótti. Osylaisha qalalyq ákimdik ishki týrizmdi damytyp, nasihattaý isin myqtap turyp qolǵa aldy.
Kentaýǵa jańadan qosylǵan 12 aýyldyq okrýgtiń de ishinde tarihi aýyldar kóp. Máselen, Jibek joly aýyldyq okrýgine qarasty Saýran – zerttelýdi qajet etetin aýyl. Mine, qazir sol isterdi júielep, alǵashqy qadamdardy jasalýda. Iaǵni, aldaǵy ýaqytta Kentaýda Rýhani jańǵyrý aiasynda tarihty túgendep, bolashaqqa baǵyt beretin igi bastamalardy jalǵasyn tabatyn bolady.
Dalanews.kz
