رۋحاني جاڭعىرۋ بىر-ەكى كۇندىك نەمەسە «جاساپ قويدىق» دەپ ايتاتىن ناۋقاندىق جۇمىس ەمەس ەكەنى انىق. بۇل – ۇدايى، ءۇزىلىسسىز جۇرگىزىلىپ وتىرۋدى قاجەت ەتەتىن، اۋقىمى كەڭ باعدارلاما دەسەك بولادى.
كەنتاۋ قالاسىنا قاراستى قارناق اۋىلىنىڭ 2000 جىلدىق تاريحى بار. تۇركىستاندا تۇرعان تايقازان دا قارناقتا قۇيىلعان. قازاقتىڭ كەمەڭگەر ۇلى م.اۋەزوۆتىڭ اتاسى بەردىقوجا، شورتانباي قاناي ۇلى سەكىلدى ءبىرتۋار ازاماتتارىمىز قارناقتاعى مەدرەسەلەردە ءبىلىم العان. ياعني قارناق – تاريحى تەرەڭ ءارى زەرتتەۋدى قاجەت ەتەتىن قازاقستانداعى ەڭ كونە اۋىلدىڭ ءبىرى.
وسى رەتتە كەنتاۋ قالاسى اكىمدىگى تۇركيا، وزبەكستان، قىرعىزستان جانە قازاقستاننىڭ بارلىق ايماعىنان عالىمداردى شاقىرتىپ، «قارناق – ورتا عاسىرداعى اعارتۋشىلىق پەن ءبىلىم ورداسى» اتتى عىلىمي كونفەرەنسيا وتكىزدى. وندا تىڭ دەرەكتەرگە نەگىزدەلگەن ورامدى ويلار ايتىلدى. كونفەرەنسيا ماتەريالدارىن ارنايى جيناق شىققانىن بىلەمىز. اۋىلداعى مىڭجىلدىق تۇت اعاشىن، شاممات يشان مەشىت-مەدرەسەسى كەڭ كولەمدە ناسيحاتتالدى. ناتيجەسىندە قارناق اۋىلىنا كەلۋشى، تۇت اعاشى مەن مەدرەسەنى كورۋشى تۋريستەردىڭ سانى ارتتى.
سونىمەن قاتار قالاعا قاراستى حانتاعى اۋىلىنداعى، ياعني قاراتاۋ بوكتەرىندە ورنالاسقان حاننىڭ تاعى جايىندا دا قىزىقتى تاريحي دەرەكتەر كوپ. وسىنى ەسكەرە وتىرىپ، اۋىلدىڭ تاريحىنا نەگىزدەلگەن «حانتاعى مۇراتى – ۇرپاققا امانات» اتتى كونفەرەنسيا ءوتتى. وسىلايشا قالالىق اكىمدىك ىشكى ءتۋريزمدى دامىتىپ، ناسيحاتتاۋ ءىسىن مىقتاپ تۇرىپ قولعا الدى.
كەنتاۋعا جاڭادان قوسىلعان 12 اۋىلدىق وكرۋگتىڭ دە ىشىندە تاريحي اۋىلدار كوپ. ماسەلەن، جىبەك جولى اۋىلدىق وكرۋگىنە قاراستى ساۋران – زەرتتەلۋدى قاجەت ەتەتىن اۋىل. مىنە، ءقازىر سول ىستەردى جۇيەلەپ، العاشقى قادامداردى جاسالۋدا. ياعني، الداعى ۋاقىتتا كەنتاۋدا رۋحاني جاڭعىرۋ اياسىندا تاريحتى تۇگەندەپ، بولاشاققا باعىت بەرەتىن يگى باستامالاردى جالعاسىن تاباتىن بولادى.
Dalanews.kz
