Ortalyqtyń ashylý saltanatyna Túrkistan oblysy ákiminiń orynbasary Erbol Tasjúrekov, Kentaý qalasynyń ákimi Ábdibaqyt Maqulbaev, Túrkistan oblysynyń densaýlyq saqtaý basqarmasynyń basshysy Muqan Egizbaev jáne medısına salasynyń ardagerleri qatysty.
Aýrýhana bazasynda ashylǵan ınsýlt ortalyǵy kompúterlik tomografıamen jabdyqtaldy. Zaman talabyna saı jańa qondyrǵy ınsýlt pen bas mı jaraqatyn naqty anyqtaýǵa múmkindik beredi. Osy ýaqytqa deıin Kentaý qalasynyń turǵyndary Túrkistan qalasyna qatynap em alýǵa májbúr bolǵan.
«Kompúterlik tomografıa aýrýdy alǵashqy belgilerinen-aq anyqtaýǵa múmkindik beredi. Apparattyń kómegimen bastaǵy isikter men qabyný prosesin, súıek qurylymyndaǵy aýrýlardyń aýyr jaǵdaıynyń ózin naqty tabýǵa bolady» deıdi mamandar. Sonymen qatar keýdedegi, qursaq qýysy men asqazan, ash ishektiń, muryn qýysy men búırektegi aýytqýlardy tekserýge bolady.
Japondyq Optima 540 kompúterlik tomografıasy oblystyq búdjet esebinen 269 mln. 500 myń teńgege satyp alynyp ornatylǵan.
Túrkistan oblystyq densaýlyq saqtaý basqarmasynyń basshysy Muqan Egizbaevtyń aıtýynsha, kelesi jyldan bastap jańa oblys ortalyǵynda birneshe aýrýhana men emhanalar, perzenthanalar men zamanaýı talapqa saı emdeý ortalyqtary boı kótermek. Jobalaý jumystaryna sheteldik kompanıalar da tartylady dep kútilýde.
– Jospar boıynsha oblys ortalyǵynan 610 oryndyq oblystyq kópsalaly aýrýhana salynady. Ekinshiden, oblystyq balalar aýrýhanasyna qosymsha 150 oryndyq ǵımarat qurylysyn bastaý qolǵa alynyp jatyr. Sondaı-aq, 500 kelýshige arnalǵan emhana men oblystyq qan jáne SPID ortalyqtarynyń, týberkýlezge qarsy jáne onkologıalyq dıspanserdiń qurylysy bastalady. Bul maqsatta jobalaý-smetalyq qujattaryna qajetti qarjy bólindi, – deıdi basqarma basshysy.
Jobalaý jumystaryna sheteldik kompanıalar da tartylady dep kútilýde.
– Medısınalyq mekemelerdiń jetispeýi máselesin sheshý úshin jumystar júrip jatyr. Shymkentte ornalasqan klınıkalar jáne balalar aýrýhanasy sol jaqta qala beredi. Oblystyq týberkýlezge qarsy jáne júıke aýrýlary dıspanseri, eki birdeı perınataldyq ortalyq jumysy jalǵasady. Mundaı tájirıbe Almaty oblysynda da, Astanada da bar. Sebebi, shalǵaı ornalasqan Maqtaaral, Shardara sıaqty aýdan turǵyndaryna Túrkistanǵa qatynaý qıynǵa soǵady. Shymkenttegi burynǵy oblystyq densaýlyq saqtaý basqarmasyndaǵy eki kabınette arnaıy mamandardy qaldyryp otyrmyz, – dedi Muqan Egizbaev.
Sonymen qatar, Túrkistan oblysyna birneshe medısınalyq nysandy salý úshin respýblıkadan qarajat bólý suralǵan. Máselen, Túrkistandaǵy perınataldyq ortalyqtyń janynan qosymsha 150 oryndyq ǵımarat salý qajettigi týyndap otyr. Kentaý qalasy men Saıram, Jetisaı aýdandaryna, Myrzakent pen Atakent kentterine 5 emhana salýǵa da respýblıkadan qarjy bólý jaǵy qarastyrylýda. Sondaı-aq, dárigerlerdiń biliktiligin arttyrý máselesi júzege asyp jatyr. Jaqynda túrkistandyq mamandar Reseıge baryp, sondaǵy bilikti dárigerlermen tájirıbe almasyp keledi.
Túrkistan oblysy ákiminiń baspasóz qyzmeti
