Ortalyqtyń ashylý saltanatyna Túrkistan oblysy ákiminiń orynbasary Erbol Tasjúrekov, Kentaý qalasynyń ákimi Ábdibaqyt Maqulbaev, Túrkistan oblysynyń densaýlyq saqtaý basqarmasynyń basshysy Muqan Egizbaev jáne meditsina salasynyń ardagerleri qatysty.
Aýrýhana bazasynda ashylǵan insýlt ortalyǵy kompiýterlik tomografiiamen jabdyqtaldy. Zaman talabyna sai jańa qondyrǵy insýlt pen bas mi jaraqatyn naqty anyqtaýǵa múmkindik beredi. Osy ýaqytqa deiin Kentaý qalasynyń turǵyndary Túrkistan qalasyna qatynap em alýǵa májbúr bolǵan.
Japondyq Optima 540 kompiýterlik tomografiiasy oblystyq biýdjet esebinen 269 mln. 500 myń teńgege satyp alynyp ornatylǵan.
Túrkistan oblystyq densaýlyq saqtaý basqarmasynyń basshysy Muqan Egizbaevtyń aitýynsha, kelesi jyldan bastap jańa oblys ortalyǵynda birneshe aýrýhana men emhanalar, perzenthanalar men zamanaýi talapqa sai emdeý ortalyqtary boi kótermek. Jobalaý jumystaryna sheteldik kompaniialar da tartylady dep kútilýde.
– Jospar boiynsha oblys ortalyǵynan 610 oryndyq oblystyq kópsalaly aýrýhana salynady. Ekinshiden, oblystyq balalar aýrýhanasyna qosymsha 150 oryndyq ǵimarat qurylysyn bastaý qolǵa alynyp jatyr. Sondai-aq, 500 kelýshige arnalǵan emhana men oblystyq qan jáne SPID ortalyqtarynyń, týberkýlezge qarsy jáne onkologiialyq dispanserdiń qurylysy bastalady. Bul maqsatta jobalaý-smetalyq qujattaryna qajetti qarjy bólindi, – deidi basqarma basshysy.
Jobalaý jumystaryna sheteldik kompaniialar da tartylady dep kútilýde.
Sonymen qatar, Túrkistan oblysyna birneshe meditsinalyq nysandy salý úshin respýblikadan qarajat bólý suralǵan. Máselen, Túrkistandaǵy perinataldyq ortalyqtyń janynan qosymsha 150 oryndyq ǵimarat salý qajettigi týyndap otyr. Kentaý qalasy men Sairam, Jetisai aýdandaryna, Myrzakent pen Atakent kentterine 5 emhana salýǵa da respýblikadan qarjy bólý jaǵy qarastyrylýda. Sondai-aq, dárigerlerdiń biliktiligin arttyrý máselesi júzege asyp jatyr. Jaqynda túrkistandyq mamandar Reseige baryp, sondaǵy bilikti dárigerlermen tájiribe almasyp keledi.
Túrkistan oblysy ákiminiń baspasóz qyzmeti
