Jerdi sheteldikterge satýǵa bolmaidy, biraq sheteldikke jalǵa berý máselesin oilanǵan jón. Bul týraly Jer reformasy jónindegi komissiianyń otyrysynda komissiia múshesi Kenjeǵali Saǵadiev osylai málim etti.
«Jalpy álemdik tájiribege qarasaq, eshbir memleket shet eldikterge jerin satyp jatqan joq. Ondai bolǵan emes. Bir aqparat boiynsha damyǵan elderde bar, alaida munyń paiyzy tym tómen, az ǵana. Eshkim satpaidy desek te bolady. Iaǵni, shet eldikterge Qazaqstannyń jerin satýǵa bolmaidy», – dedi K. Saǵadiev.
Sonymen qatar, ol Qazaqstandaǵy bos, paidasyz jatqan jerlerdiń taǵdyryna alańdaýshylyq bildirdi. Onyń aitýynsha, jerge tiispei, ony kelesi urpaqqa qaldyrýǵa da bolady, biraq olai istesek keler urpaqqa osy daýdy da ysyryp tastaýǵa týra keledi. «Degenmen, biz jerge tiispeimiz, ony keler urpaqqa qaldyramyz der júrip, onyń qunarlyǵynan aiyrylyp qalmaimyz ba? Jer tozyp barady. Meniń oiymsha, jerdi sheteldikterge jalǵa berýge bolady. Qazaqstan mynadai jerdiń barlyǵyna ielik etip, ony óz betinshe qarai almaidy. Ol shyndyq, qalai aitsaq ta shyndyq sonda.
Dei turǵanymen, halyqtyń kóterip otyrǵan shyndyǵy bar. Ol tarihtan belgili, Reseige, Qytaiǵa qatysty máselelerdi aityp otyrmyn. Bul qaýiptyń bolýy da ras. Osy turǵydan alǵanda «jerdi kórshiles memleketterdiń azamattaryna jalǵa berýge bolmaidy» dep aityp júrgender bar. Ol qaýipti de túsinýge tiispiz. Alaida alalaýǵa da bara almaimyz. Degenmen, shetelge jalǵa berý degen Qytaidy elimizge ákelý degen sóz emes. Bul kim kóringen jer beriledi degen sóz emes. Halyqtyń qobaljyp otyrǵanyn túsine otyryp, zańdardyń qaýqaryn arttyrýǵa tiispiz.
Jalǵa beretin bolsaq, birtalai ýaqyttan soń sheteldikterdiń menshigine ótip ketetinin halyq aityp jatyr. Endeshe, sol jerdiń sheteldikke ótip ketpeýiniń bárin zańda qamtyp tastasaq qaitedi? Onyń bárin isteýge de bolady ǵoi! Jer kodeksinen bastap, Otbasy týraly, kóshi-qon týraly zańnyń bárin qaita qarap, jerdi eshkimniń menshigine ótip ketpeitinin qamtyiyq», dedi K. Saǵadiev.
Budan bólek, komissiia múshesi jerdi jalǵa berý merzimin qaita qaraý kerektigin alǵa tartyp, ony 25 jyldan qaitadan burynǵy 10 jylǵa túsirýdi usyndy.
Derekkóz: inform.kz
