ShQO-nyń mamandandyrylǵan tabiǵat qorǵaý prokýratýrasy Iýbileino-Snegirihinskii kenishin joiý kezinde Kishi Qaraqoja ózeniniń lastanǵanyn anyqtady, dep habarlaidy Dalanews.kz.
«Qazgidromettiń» oblystaǵy filialy ózen sýynda metaldardyń kóptigin anyqtap otyr.
Boljamǵa qaraǵanda, «Vostoktsvetmet» JShS kenishti joiý tehnologiiasyn buzyp, saldarynan shahtadan aqqan sý ózendi lastaǵan.
Prokýratýra ýákiletti memlekettik organdarmen, táýelsiz sarapshylarmen, «Vostoktsvetmet» JShS-men birlesip, kenishke komissiialyq saraptama júrgizdi. Tekserý barysynda sý shyǵyp jatqan kóptegen oryndar anyqtaldy. Sý kenish aýmaǵy arqyly aǵyp, keiin Kishi Qaraqoja, Qaraqoja, Úbi ózenderine quiylǵan.
ShQO prokýratýrasynyń málimetinshe, ekologiia departamenti júrgizgen zerthanalyq tekserý sýda aýyr metaldardyń (myrysh, kadmii, temir, marganets, t.b.) ruqsatty normadan 83 myń ese asqanyn rastady. Sondai-aq kenish aýmaǵyn rekýltivatsiialaý durys júrgizilmegen.Osy zańbuzýshylyqtarǵa bailanysty ShQO tabiǵat qorǵaý prokýratýrasy Astana qalasynyń ekonomikalyq sotyna kenishti joiý aktisin zańsyz dep taný týraly talap-aryzben júgindi. Sot bul talapty 17 sáýirde qanaǵattandyrdy.
Sot aktisi zańdy kúshine engennen keiin kásiporynnyń jaýapkershiligi týraly másele zań sheńberinde sheshiletin bolady.
