شقو-نىڭ مامانداندىرىلعان تابيعات قورعاۋ پروكۋراتۋراسى يۋبيلەينو-سنەگيريحينسكيي كەنىشىن جويۋ كەزىندە كىشى قاراقوجا وزەنىنىڭ لاستانعانىن انىقتادى، دەپ حابارلايدى Dalanews.kz.
«قازگيدرومەتتىڭ» وبلىستاعى فيليالى وزەن سۋىندا مەتالداردىڭ كوپتىگىن انىقتاپ وتىر.
بولجامعا قاراعاندا، «ۆوستوكسۆەتمەت» ج ش س كەنىشتى جويۋ تەحنولوگياسىن بۇزىپ، سالدارىنان شاحتادان اققان سۋ وزەندى لاستاعان.
پروكۋراتۋرا ۋاكىلەتتى مەملەكەتتىك ورگاندارمەن، تاۋەلسىز ساراپشىلارمەن، «ۆوستوكسۆەتمەت» جشس-مەن بىرلەسىپ، كەنىشكە كوميسسيالىق ساراپتاما جۇرگىزدى. تەكسەرۋ بارىسىندا سۋ شىعىپ جاتقان كوپتەگەن ورىندار انىقتالدى. سۋ كەنىش اۋماعى ارقىلى اعىپ، كەيىن كىشى قاراقوجا، قاراقوجا، ءۇبى وزەندەرىنە قۇيىلعان.
شقو پروكۋراتۋراسىنىڭ مالىمەتىنشە، ەكولوگيا دەپارتامەنتى جۇرگىزگەن زەرتحانالىق تەكسەرۋ سۋدا اۋىر مەتالداردىڭ (مىرىش، كادميي، تەمىر، مارگانەس، ت.ب.) رۇقساتتى نورمادان 83 مىڭ ەسە اسقانىن راستادى. سونداي-اق كەنىش اۋماعىن رەكۋلتيۆاسيالاۋ دۇرىس جۇرگىزىلمەگەن.وسى زاڭبۇزۋشىلىقتارعا بايلانىستى شقو تابيعات قورعاۋ پروكۋراتۋراسى استانا قالاسىنىڭ ەكونوميكالىق سوتىنا كەنىشتى جويۋ اكتىسىن زاڭسىز دەپ تانۋ تۋرالى تالاپ-ارىزبەن جۇگىندى. سوت بۇل تالاپتى 17 ساۋىردە قاناعاتتاندىردى.
سوت اكتىسى زاڭدى كۇشىنە ەنگەننەن كەيىن كاسىپورىننىڭ جاۋاپكەرشىلىگى تۋرالى ماسەلە زاڭ شەڭبەرىندە شەشىلەتىن بولادى.
