Kásipker Keńes Raqyshev jeke menshik iesi bolyp tabylatyn "Fincraft Group" JShS Tethys Petroleum Limited munai-gaz kompaniiasynyń 15,16% aktsiiasyn satyp aldy. Bul týraly 26 qarashada Qazaqstan qor birjasy saitynda jariialanǵan aqparattan belgili boldy, dep habarlaidy Dalanews.kz.
Fincraft Group quramyna BTA banki, Shoqan Ýálihanov atyndaǵy jekemenshik mektep, Nordland Petroleum Inc., Equus Petroleum Limited, Shoqan Academy jáne Beineu Petroleum Limited enedi.
Tethys Petroleum — Qazaqstanda jumys isteitin, degenmen Kaiman araldarynda tirkelgen munai-gaz kompaniiasy. Onyń negizgi qyzmeti shiki munai men tabiǵi gaz ken oryndaryn satyp alý, barlaý jáne igerý bolyp tabylady.
"2023 jyldyń sońynda Tethys Petroleum Qazaqstanda tórt kelisimshartqa: Qyzyloi ken ornyn óndirýge, Aqqul ken ornyn óndirýge (gaz kelisimsharttary), Aqqul ken ornyn barlaýǵa (Doris munai ken ornyn jáne basqalaryn qamti otyryp), sondai-aq Qul-Bas ken ornyn barlaýǵa jáne igerýge qol jetkizdi. Tethys Petroleum quramyna 100% úlesi bar segiz enshiles uiym kiredi: Tethys Kazakhstan SA, Transcontinental Oil Transportation srl, Tethyda Limited, TPL Holdings Limited, DMS Services LLP, Tethys Aral gas LLP, Kul-Bas JShS, Tethys Services Kazakhstan LLP. Sondai-aq, kompaniia Araldaǵy munai terminalynyń 50% úlesine ie", dep jazady Forbes.kz.
Qarjylyq esepterge súiensek, 2023 jyly Tethys Petroleum 9,7 million dollar, 2022 jyly 12,3 million dollar tabys tapqan. Al 2024 jyldyń 1 shildesindegi jaǵdai boiynsha kompaniianyń taza kirisi nebári 44 myń dollardy qurapty.
Tethys Petroleum Torontodaǵy TSX Venture Exchange qor birjasynda bastapqy listingke ie (damýshy kompaniialar úshin venchýrlyq kapitaldyń qoǵamdyq alańy). Sondai-aq, Qazaqstan qor birjasynda (KASE) da tirkelgen.
Buǵan deiin jergilikti BAQ-tarǵa bergen suqbatynda Keńes Raqyshev qazirgi ýaqytta "munai-gaz aktivterin satyp alý boiynsha birqatar mámileler" jasasyp jatqanyn aitqan. Qyrkúiek aiynyń basynda Fincraft Group Beineu Petroleum Limited munai-gaz kompaniiasyndaǵy 40% úlesin satyp ta aldy. Bul rette biznesmen óziniń kompaniiasynyń shyǵynǵa ushyraýyna ákelip soqtyrǵan qarjy salasyndaǵy aktivterinen belsendi túrde arylyp jatqanyn moiyndaǵan edi (2024 jylǵy 1 shildedegi jaǵdai boiynsha Fincraft Group-tyń shyǵyny 19,3 mlrd teńgeni qurady). Bul arada Ýkrainadaǵy BTA banki týraly sóz bolyp otyr, ol áli satylý protsesinde. Al Belarýs elindegi BTA banki 2024 jyldyń maýsymynda SNRG Capital Eurasia kompaniiasyna satyldy.
Keńes Raqyshev Forbes-tyń eń bai biznesmender reitingisinde 19-shy orynda tur (2024). Onyń bailyǵy 435 million dollarǵa baǵalanady.
