Kásipker Keńes Raqyshev óziniń Fincraft Group kompaniiasy arqyly KASE-ge 20 mln dollar tartýdy josparlap otyr. Bul týraly qarjylyq top birjany habardar etken, dep habarlaidy Dalanews.kz.
Qarjylyq top "ainalym merzimi 12 aidan aspaityn" qamtamasyz etilmegen kýpondyq obligatsiialardy shyǵarýǵa nietti. Mundai sheshimdi Fincraft Group JShS-niń jalǵyz qatysýshysy Keńes Rakishev qabyldady, dep jazady Kapital.kz.
Aita ketsek, Keńes Raqyshev óz portfelinen taý-ken ǵana emes, sonymen qatar qarjylyq aktivterin de birtindep shyǵaryp, olardan túsken tabysty munai-gaz aktivterine investitsiialaýda. 2024 jyldyń qazan aiynda kásipker Fincraft Group osyndai strategiia ustanyp otyrǵanyn aitqan.
"Biz tereńdete óńdelgen túrli munai ónimderie, iaǵni qosymsha qun salyǵy joǵary taýarlarǵa nazar aýdarǵymyz keledi", - degen edi ol.
Mysaly, 2023 jyldyń qyrkúieginde Fincraft Resources KASE-ge "InderGips" JShS-daǵy 100% úlesin satqanyn habarlady. Al 2024 jyldyń qańtarynda Keńes Rakishev Fincraft Resources arqyly Nomad West oil munai jáne ilespe gaz óndirý kompaniiasynda 50% úleske ie boldy. 2024 jyldyń jeltoqsanynda Keńes Raqyshev munai-gaz salasyndaǵy Tethys Petroleum Limited-tiń 7,35% aktsiialaryn satyp alatynyn málimdedi. Kelisim sharttaryna sáikes, aktsiialar bir qaǵaz úshin 0,7719 kanadalyq dollarǵa satyp alynbaq. Jalpy mámile quny 6 mln 518 myń kanadalyq dollardan asady.
"Mámileler belgili bir ruqsattardy alýǵa bailanysty 2025 jyldyń birinshi toqsanynda aiaqtalady dep kútiledi", - delingen toptyń habarlamasynda.
2024 jyldyń qazan aiynda qarjylyq top 30 million 959 myń 133 jai aktsiiany satyp alý nieti baryn jariialady, bul - shyǵarylǵan aktsiialardyń jalpy sanynyń 26,95%-y.
"Qazirgi ýaqytta Fincraft 23 mln 009 myń 133 qarapaiym aktsiialardy satyp alyp úlgerdi. Aǵymdaǵy mámile aiaqtalǵannan keiin topqa tiesili nemese janama menshiktegi qarapaiym aktsiialar sany 39 mln 402 myń 531 quraidy, bul - Tethys Petroleum Limited-tyń shyǵarǵan aktsiialarynyń jalpy sanynyń 34,31%-y", delingen qazan aiynda.
2024 jyldyń maýsym aiynda Keńes Raqyshev BTA-nyń enshilesi – BTA Belarýsty qazaqstandyq kásipker Sultan Marenovqa "SNRG Capital Eurasia" JShS arqyly satty. Mámile somasy 230 mln teńgeni qurady. Keiinirek bank ataýyn "Neo Bank Aziia" JAQ dep ózgertildi (Neo Bank).
Sol jyldyń jeltoqsanynda Fincraft Group BTA Banktiń 29,64043% aktsiialarynan ajyrady.
"Bul mámile holdingishilik mámile bolyp tabylady: "BTA Bank" AQ aktsiialarynyń bir bóligi Fincraft Group quryltaishysy Keńes Rakishev túpkilikti benefitsiary bolyp tabylatyn kompaniianyń basqarýyna berildi. Sondai-aq bul "BTA Banki" AQ bizdiń kompaniia úshin beiindik aktiv bolýdy toqtatqandyǵyna bailanysty", dep habarlady Fincraft Group baspasóz qyzmeti.
Jasalǵan osy mámileden keiin Keńes Raqyshev áli de "BTA Banki" aktsiialarynyń 100% paketiniń iesi bolyp qala beretini naqtylandy: oǵan banktiń daýys beretin aktsiialarynyń 70,07%-y jáne jalǵyz quryltaishy bolyp tabylatyn kompaniia arqyly daýys beretin aktsiialardyń 29,64043%-y tikelei tiesili. 2019 jyly ol BTA bankin (Qyrǵyzstan) satty, ol 2020 jyly jergilikti "Baqai bankimen" biriktirildi.
Al BTA Banki (Ýkraina) jáne "Kaznikel" JShS boiynsha satý protsesi áli júrip jatyr.
BTA bankin (Ýkraina) satý týraly mámile jaqyn arada jabylýy múmkin. Fincraft Group-tyń 2023 jylǵy shoǵyrlandyrylǵan qarjylyq esebinde, "2022 jylǵy qazanda avansy tólene otyryp, "BTA Bank" JAQ (Ýkraina) 100% aktsiialarynyń satyp alý-satý týraly aldyn ala shart jasaldy". Kelisimshart kimmen jasalǵany jáne mámileniń basqa málimetteri beimálim. 2024 jyldyń qyrkúieginde Fincraft Group kompaniiasy arqyly Keńes Rakishev "BTA Ýkraina" JAQ-ty satýda aldaǵy mámile boiynsha aldyn ala tólemdi, iaǵni 4,5 mlrd teńge alǵany belgili boldy.
Fincraft Resources esebinde, 2023 jyldyń shildesinde "Qaznikel" JShS-ny satý týraly sheshim qabyldaǵany habarlandy.
"Qaznikeldiń 100% jai daýys berýshi aktsiialaryn BMT Nico jekemenshik kompaniiasyna (ol Fincraft Resources tobyna kiredi) satý josparlanýda. Tiisti qujattarǵa qol qoiyldy. Saýda protsesi 2024 jyldyń birinshi jartyjyldyǵynda aiaqtalady dep kútiledi", delingen toptyń qarjylyq esebinde. 2024 jyldyń qazan aiynda óz suqbatynda Keńes Raqyshev kompaniiany sheteldik investor satyp alatynyn aitty.
Fincraft Group-tyń sońǵy benefitsiary Keńes Raqyshev bolyp tabylady.
