Shymkent qalasynda jyl basynan beri áleýmettik mańyzy bar azyq-túlik taýarlarynyń baǵasyn negizsiz kótergen 200-den astam kásipker jaýapkershilikke tartyldy. Onyń 15-i – et baǵasyn ósirgender, dep habarlaidy Dalanews.kz.
Degenmen Shymkent qalalyq aýyl sharýashylyǵy basqarmasy siyrdyń taza eti (miakot) baǵa retteý tizimine jatpaitynyn naqtylaidy. Basqarma málimetinshe, áleýmettik mańyzy bar azyq-túlik baǵasyn baqylaý maqsatynda júzdegen saýda núktesine monitoring júrgizilgen. Aita keteiik, siyr eti (jaýyryn-tós bóligi, súiekti) baǵasy baqylaýǵa alynǵan 19 ataýly áleýmettik mańyzy bar azyq-túlik túrleriniń tizimine kiredi.
"Búginde Shymkent qalasynda 60-qa jýyq áleýmettik saýda núktesi jumys isteidi. Budan bólek, apta saiyn aýyl sharýashylyǵy jármeńkeleri ótkiziledi. Onda da súiekti siyr eti turaqty baǵamen bir kelisi 3200-3300 teńge aralyǵynda satylady. Et ónimderi Túrkistan oblysyndaǵy mal sharýashylyǵy fermalarynan tikelei jetkiziledi", — deidi aýyl sharýashylyǵy basqarmasynyń basshysy Talǵat Mekambaev.
Basqarma basshysynyń aitýynsha, "Kaskasý-S" jáne "Báiterek" sharýa qojalyqtarymen jasalǵan kelisimsharttar aiasynda 1 keli ettiń ótkizý baǵasy – 2 620 teńge.
Sondai-aq, "ainalym shemasy" tetigi sheńberinde Magnum jáne Gramad saýda jelilerimen kelisimder jasalǵan. Bul súiekti siyr etin (jaýyryn-keýde bóligi) 2 590 teńge kólemindegi turaqty baǵamen satýǵa múmkindik berip otyr.
Basqarma ókilderi bazarda 1 kelisi 3800-4000 teńgege deiin jetetin kommertsiialyq ettiń de bar ekenin aitty. Alaida keibir saýda oryndarynda baǵa turaqty saqtalǵan.
- Jekemenshik saýda núktelerindegi baǵanyń ósýin mamandar maýsymdyq suranys, mal azyǵy baǵasynyń qymbattaýy jáne eksport kóleminiń artýymen bailanystyrady. Soǵan qaramastan, qalada etke degen tapshylyq pen ajiotaj baiqalmaidy, – dedi basqarma basshysy.
Ákimdik qala turǵyndaryn áleýmettik mańyzy bar azyq-túlik baǵasy baqylanatyn jáne retteletin saýda oryndaryn tańdap, solarǵa júginýge shaqyrdy.
