Aýdannyń eńbekqor sharýlary jergilikti halyqty aýyl sharýashylyǵy ónimderimen qamtamasyz etip, kásipteriniń jemisin kórýde. Solardyń biri – kelestik sharýa Ómirzaq Maqsat. Ol úsh jyldan beri pıaz egip, tabysyn eseleýde. Sharýa Jańadáýir aýylynda ornalasqan 2 gektar sýarmaly jerine ótken jyldyń tamyz aıynda pıaz ekken. Bıyl maýsym aıynyń basynda ekken ónimin saýdaǵa shyǵarýǵa daıyn otyr. Sharýa mol ónim alýda kásibı mamandardyń keńesine qulaq túretinin aıtyp ótti.
– Pıaz egýmen úsh jyldan beri aınalysyp kelemiz. Ónimniń tuqymyn kórshi ózbek elinen aldyramyz. Olar Koreıadan daqyldardy arnaıy aldyryp, suryptap, saýdalap otyr.
Bıylǵy ekken pıazymyzdyń sorty «Passad» dep atalady. Bul suryp uzaq kúnde daıyn bolýymen erekshelenedi. Esesine ónim mol alynady. Ótken jyldyń tamyz aıynda tuqymyn jetildirip, qazan aıynda kóshet qylyp otyrǵyzdyq. Qysymen qardyń astynda jatady. Kóktemde óńdeý jasalyp, ónim alýǵa daıyndaımyz. Ónimdi eseleý úshin túrli synalǵan dárýmender qoldanylady. Nátıjesinde pıaz ekken sharýalar gektarynan 80-90 tonnaǵa deıin ónim jınaıdy, – deıdi sharýa.
Aıta keteıik, bıyl Keles aýdanynda 27 myńnan asa aýmaqqa egin egilse, onyń 11 myńǵa jýyq jerine baqsha, kókónis ónimderi egilgen. Jalpy ótken jyly sharýalardyń tynymsyz eńbegininiń arqasynda aýdan boıynsha 458 359 tonna ónim óndirildi.
