Keles aýdany bilim bólimine qarasty №31 Sh.Ýálihanov atyndaǵy jalpy bilim beretin mektebiniń tarihi-arheologiialyq murajaiynda mektep aýlasynan tabylǵan qundy jádigerler jeterlik. Sonyń ishinde 1353 jyly tastan jasalǵan qol diirmenderin de atap ótý kerek, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Mektep basshysynyń málimdeýinshe, murajaida HVIII-HIH ǵasyrlarǵa tieseli aǵash shoqpar men ojaý, ejelgi qańly dáýirine tieseli saz balshyqtan jasalǵan qumyralar men ydystar bar. Sondai-aq sórelerge kóne monetalar men qoladan jasalǵan sháinek, kese sekildi turmystyq zattar qoiylǵan eken.
– Júzimdik aýylynda ornalasqan mektep aýlasyna 1985-1986 jyldary arheologiialyq qazba jumystary júrgizilgen. Jalpy aýmaǵy 68 sharshy metrdi quraityn murajai eki bólmeden turady. Ekspozitsiialyq bólmeniń aýmaǵy – 56 sharshy metr. Murajaida jalpy 152 eksponat bar. Balalar qazirgi tańda osy jádigerlerdi zerttep, ǵylymi-zertteý jumystaryn da jazýda, – deidi mektep direktory Aqmaral Qambarova.
Ustazdardyń aitýynsha, qazirgi kezde de mektep aýlasynda, aýyl mańynda kóptegen jádigerlerdi kezdestirýge bolady. Tarihshy mamandardyń qorytyndysyna sáikes, osy aimaqtan tabylǵan tarihi eksponattar bizdiń zamanymyzdyń I-XIII ǵasyrlardaǵy Qańly memleketi men Qarahan memleketi kezeńderine jatady.
