كەلەس اۋدانى ءبىلىم بولىمىنە قاراستى №31 ش.ءۋاليحانوۆ اتىنداعى جالپى ءبىلىم بەرەتىن مەكتەبىنىڭ تاريحي-ارحەولوگيالىق مۇراجايىندا مەكتەپ اۋلاسىنان تابىلعان قۇندى جادىگەرلەر جەتەرلىك. سونىڭ ىشىندە 1353 جىلى تاستان جاسالعان قول ديىرمەندەرىن دە اتاپ ءوتۋ كەرەك، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

مەكتەپ باسشىسىنىڭ مالىمدەۋىنشە، مۇراجايدا حVءىىى-حىح عاسىرلارعا تيەسەلى اعاش شوقپار مەن وجاۋ، ەجەلگى قاڭلى داۋىرىنە تيەسەلى ساز بالشىقتان جاسالعان قۇمىرالار مەن ىدىستار بار. سونداي-اق سورەلەرگە كونە مونەتالار مەن قولادان جاسالعان شاينەك، كەسە سەكىلدى تۇرمىستىق زاتتار قويىلعان ەكەن.

– جۇزىمدىك اۋىلىندا ورنالاسقان مەكتەپ اۋلاسىنا 1985-1986 جىلدارى ارحەولوگيالىق قازبا جۇمىستارى جۇرگىزىلگەن. جالپى اۋماعى 68 شارشى مەتردى قۇرايتىن مۇراجاي ەكى بولمەدەن تۇرادى. ەكسپوزيسيالىق بولمەنىڭ اۋماعى – 56 شارشى مەتر. مۇراجايدا جالپى 152 ەكسپونات بار. بالالار قازىرگى تاڭدا وسى جادىگەرلەردى زەرتتەپ، عىلىمي-زەرتتەۋ جۇمىستارىن دا جازۋدا، – دەيدى مەكتەپ ديرەكتورى اقمارال قامباروۆا.

ۇستازداردىڭ ايتۋىنشا، قازىرگى كەزدە دە مەكتەپ اۋلاسىندا، اۋىل ماڭىندا كوپتەگەن جادىگەرلەردى كەزدەستىرۋگە بولادى. تاريحشى مامانداردىڭ قورىتىندىسىنا سايكەس، وسى ايماقتان تابىلعان تاريحي ەكسپوناتتار ءبىزدىڭ زامانىمىزدىڭ I-XIII عاسىرلارداعى قاڭلى مەملەكەتى مەن قاراحان مەملەكەتى كەزەڭدەرىنە جاتادى.