Keler jyly Túrkistandaǵy 175 eldi-meken ákimderiniń derbes biýdjeti qalyptasady
Aldymen aýyl ishindegi jolǵa aýdannan qarjy bólinip, asfalt tóselip jatyr. Buiyrtsa, kelesi jyly jergilikti qordan eskirgen baǵanalar jańartylyp, jaryq ornatylmaq.
Al Turar Rysqulov aýyldyq okrýgine tórt eldi meken toptasqan. Jeti myńnan astam halyq turatyn aýylda áleýmettik máseleler sheshilgen. Aýyzsý ár úide bar, kógildir otynmen tolyq qamtylǵan. Ózge túitkildiń túiinin jurt jabylyp júrip birge tarqatady. Kósheler abattandyrylyp, Aradegrler alleiasy men Belgisiz soldat monýmenti demeýshilerdiń arqasynda boi túzgen. Osylaisha jastary úlkenderdiń keńesin tyńdaityn aýyl birliktiń bekem mekenine ainalǵan.
Aýyldaǵy qordalanǵan máseleni sheshý úshin buryn ákim aýdanǵa qol jaiyp qarap otyratyn. Endi jaǵdai múldem basqasha bolady. Óitkeni okrýg ákiminiń óz biýdjeti bolady. Jergilikti jerdiń qyr-syryn jaqsy biletin basshy ol aqshany maqsatty jumsaýǵa tyrysady. Óitkeni memleket qarjysynyń árbir tiyny suralady.
Maqulbek Amanov, Turar Rysqulov aýyldyq okrýginiń ákimi:
Jaqynda qoǵamdyq jinalys ótkizip, biýdjetti jobalap, josparlap qoiǵanbyz. Biýdjetti 10 mln teńge dep jobalap otyrmyz. Birinshi kezekte bul qarjyny eń qajetti degen salaǵa – gazy bar, sýy bar, joly bar jaryǵy bar, soǵan jumsaimyz.
Elimizdegi ózin-ózi basqarý júiesindegi jańalyq keler jyldyń 1 qańtarynan bastap júzege asady. Osylaisha óńirde jalpy halyq sany eki myńnan asatyn 175 eldi meken ákimderiniń derbes biýdjeti qalyptaspaq.
Qalǵan eldi mekender bul júiege 2020 jylǵa deiin engiziledi.
Arman Sábitov, oblystyq ekonomika jáne biýdjettik josparlaý basqarmasynyń basshysy:
- Aýyldyq okrýgterde 4-deńgeili biýdjet bolǵan jaǵdaida, bularǵa 6 salyq kózi kiristeri jáne tólemder, aiyppuldar, jarnamaǵa salynatyn tólemder okrýg biýdjetine túsetin bolady. Ony jergilikti máslihat bekitip beredi. Qadaǵalaý jumsaý aýyl ákiminiń quzyrynda. Bul eldi meken, halyqtyń jaǵdaiyn jaqsartýǵa jasalyp jatqan jumys dep esepteimin.
