الدىمەن اۋىل ىشىندەگى جولعا اۋداننان قارجى ءبولىنىپ، اسفالت توسەلىپ جاتىر. بۇيىرتسا، كەلەسى جىلى جەرگىلىكتى قوردان ەسكىرگەن باعانالار جاڭارتىلىپ، جارىق ورناتىلماق.
ال تۇرار رىسقۇلوۆ اۋىلدىق وكرۋگىنە ءتورت ەلدى مەكەن توپتاسقان. جەتى مىڭنان استام حالىق تۇراتىن اۋىلدا الەۋمەتتىك ماسەلەلەر شەشىلگەن. اۋىزسۋ ءار ۇيدە بار، كوگىلدىر وتىنمەن تولىق قامتىلعان. وزگە تۇيتكىلدىڭ ءتۇيىنىن جۇرت جابىلىپ ءجۇرىپ بىرگە تارقاتادى. كوشەلەر اباتتاندىرىلىپ، ارادەگرلەر اللەياسى مەن بەلگىسىز سولدات مونۋمەنتى دەمەۋشىلەردىڭ ارقاسىندا بوي تۇزگەن. وسىلايشا جاستارى ۇلكەندەردىڭ كەڭەسىن تىڭدايتىن اۋىل بىرلىكتىڭ بەكەم مەكەنىنە اينالعان.
اۋىلداعى قوردالانعان ماسەلەنى شەشۋ ءۇشىن بۇرىن اكىم اۋدانعا قول جايىپ قاراپ وتىراتىن. ەندى جاعداي مۇلدەم باسقاشا بولادى. ويتكەنى وكرۋگ اكىمىنىڭ ءوز بيۋدجەتى بولادى. جەرگىلىكتى جەردىڭ قىر-سىرىن جاقسى بىلەتىن باسشى ول اقشانى ماقساتتى جۇمساۋعا تىرىسادى. ويتكەنى مەملەكەت قارجىسىنىڭ ءاربىر تيىنى سۇرالادى.
ماقۇلبەك امانوۆ، تۇرار رىسقۇلوۆ اۋىلدىق وكرۋگىنىڭ اكىمى:
جاقىندا قوعامدىق جينالىس وتكىزىپ، بيۋدجەتتى جوبالاپ، جوسپارلاپ قويعانبىز. بيۋدجەتتى 10 ملن تەڭگە دەپ جوبالاپ وتىرمىز. ءبىرىنشى كەزەكتە بۇل قارجىنى ەڭ قاجەتتى دەگەن سالاعا – گازى بار، سۋى بار، جولى بار جارىعى بار، سوعان جۇمسايمىز.
ەلىمىزدەگى ءوزىن-وزى باسقارۋ جۇيەسىندەگى جاڭالىق كەلەر جىلدىڭ 1 قاڭتارىنان باستاپ جۇزەگە اسادى. وسىلايشا وڭىردە جالپى حالىق سانى ەكى مىڭنان اساتىن 175 ەلدى مەكەن اكىمدەرىنىڭ دەربەس بيۋدجەتى قالىپتاسپاق.
قالعان ەلدى مەكەندەر بۇل جۇيەگە 2020 جىلعا دەيىن ەنگىزىلەدى.
ارمان ءسابيتوۆ، وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى:
- اۋىلدىق وكرۋگتەردە 4-دەڭگەيلى بيۋدجەت بولعان جاعدايدا، بۇلارعا 6 سالىق كوزى كىرىستەرى جانە تولەمدەر، ايىپپۇلدار، جارناماعا سالىناتىن تولەمدەر وكرۋگ بيۋدجەتىنە تۇسەتىن بولادى. ونى جەرگىلىكتى ءماسليحات بەكىتىپ بەرەدى. قاداعالاۋ جۇمساۋ اۋىل اكىمىنىڭ قۇزىرىندا. بۇل ەلدى مەكەن، حالىقتىڭ جاعدايىن جاقسارتۋعا جاسالىپ جاتقان جۇمىس دەپ ەسەپتەيمىن.
