Qymbat jyljymaityn múlik pen kólik satyp alǵanymen, resmi tabys kózi joq qazaqstandyqtar salyq organdarynyń nazaryna iligýi múmkin. Mundai jaǵdaida olardan aqshanyń qaidan kelgenin túsindirý suralady. Bul týraly qarjy vitse-ministri Áset Turysov málimdedi, dep habarlaidy dalanews.kz.
Onyń aitýynsha, eki jylǵa jýyq ýaqyttan beri jumys istep kele jatqan Smart Data Finance júiesi azamattar men zańdy tulǵalardyń tsifrlyq profilderin paidalanyp, túrli derekterdi taldaýǵa múmkindik beredi.
«Mysaly, sońǵy eki-úsh jylda úi, páter nemese bes-alty kólik satyp alsańyz, biraq tabys kózińiz de, jalaqyńyz da bolmasa, árine, tiisti suraqtar týyndaidy», – dedi Áset Turysov.
Vitse-ministrdiń sózinshe, salyq organdarynyń azamattardan tabys kózin túsindirýdi talap etý quqyǵy burynnan bar. Bul talap Salyq kodeksinde de qarastyrylǵan.
Alaida aqshanyń qaidan kelgenin rastai almaǵan azamattarǵa qandai shara qoldanylatyny týraly suraqqa Áset Turysov naqty jaýap bermedi. Ol bul máseleni Memlekettik kirister komitetinen naqtylaýǵa keńes berdi.
