Elordada Creative Aimaq respýblikalyq jobasy aiasynda «Aqtobe Creative Days mádeni-kreativti kórme-jármeńkesi jumysyn bastady. Eki kúnge josparlanǵan sharada Aqtóbe oblysynyń 100-den astam kreatory 30-ǵa jýyq baǵyt boiynsha avtorlyq ónimderin, shyǵarmashylyq jobalary men jergilikti brendterin tanystyrady, dep habarlaidy dalanews.kz.
Is-shara Kreativti indýstriialardy damytý qorynyń alańynda, Qazaq Creative Hub keńistiginde ótip jatyr. Qatysýshylar qatarynda qolóner sheberleri, dizainerler men sýretshiler, mádeniet mekemeleriniń shyǵarmashylyq ujymdary, IT mamandary jáne T. Bigeldinov atyndaǵy Áýe qorǵanysy kúshteriniń áskeri institýty kýrsanttary bar.
Kórmede zergerlik buiymdar, teri, aǵash, súiek pen júnnen jasalǵan týyndylar, kiiz buiymdary, syrmaq, basqur, ulttyq aksessýarlar men kádesyilar usynylǵan. Kelýshiler sheberlerdiń jumys barysyn kórip, praktikalyq sheberlik sabaqtaryna qatysa alady.
Baǵdarlamada zerger Bolat Atyraýbaev, kiiz basý sheberi Rabiǵa Ispýlatova, qolóner sheberi Erqosai Ábilov jáne sýretshi Qairat Noǵaevtyń sabaqtary qarastyrylǵan. Ekspozitsiia dástúrli qolóner úlgilerimen qatar, zamanaýi suranysqa beiimdelgen avtorlyq ónimderdi de qamtidy.
Kórme-jármeńkeniń sán keńistiginde aqtóbelik jeti dizainerdiń toptamalary tanystyrylǵan. Sán kórsetilimine «SAULEMAI COUTURE», «Trumova Collection», «SYRMAK», «ULPAN SAN UI», «MARKA» sán úileri men Azamat SAIN brendi qatysady.
Máselen, «SYRMAK» dástúrli syrylyp tigiletin syrt kiim úlgilerin zamanaýi oversize pishinimen úilestirse, «Trumova Collection» ulttyq naqyshty áielder kiimine engizedi. «ULPAN» men «SAULEMAI» de dástúrli qundylyqtardy zamanaýi sán tilimen jetkizýge basymdyq beredi.
2015 jyly qurylǵan Azamat SAIN brendi balalar kiiminiń toptamasyn pash etedi. Brend sapaly materialdarǵa, kiim bólshekteriniń muqiiat oryndalýyna jáne zamanaýi dizainǵa mán beredi. Onyń ónimderi buǵan deiin sheteldik sán alańdarynda da tanystyrylǵan.
Dimash Qudaibergenniń shyǵarmashylyǵyna arnalǵan ekspozitsiia da kórme-jármeńkeden oryn tapty. Álemge tanymal ánshiniń halyqaralyq sahnadaǵy jetistikteri, shyǵarmashylyq ereksheligi jáne týǵan óńirimen bailanysyn kórsetetin zattary sharanyń sánin keltirip tur.
Tehnologiialyq baǵytta T. Bigeldinov atyndaǵy Áýe qorǵanysy kúshteriniń áskeri institýty kýrsanttarynyń IT-jobalary tanystyrylýda. Bul bólim jas mamandardyń tehnikalyq shyǵarmashylyǵyn jáne tsifrlyq sheshimderdi qoldaný múmkindikterin kórsetýge arnalǵan.
Sonymen qatar ádebiet pen zamanaýi vizýaldy ónerdiń bailanysy da qamtylǵan. Kórmede Aqtóbe óńirinen shyqqan aqyn-jazýshylardyń kitaptary jinaqtalǵan Book Market jumys isteidi. Kitaphana salasyndaǵy jańa jobalar men oqý mádenietin damytýǵa baǵyttalǵan bastamalar da bul kreatorlar sharasynda pash etilgen.
Kórme-jármeńke kelýshileri «Daryn» memlekettik jastar syilyǵynyń iegeri, jas jazýshy Álihan Jaqsylyqtyń Aqtóbe óńirine arnalǵan animatsiialyq filmi, Aqtóbe oblystyq «Alaqai» qýyrshaq teatrynyń erekshe balalarǵa arnalǵan «Jyl mezgilderi» inkliýzivti qoiylymyn tamashalai alady.
Mýzykalyq baǵdarlamada «SherTer» kreativti jobasynyń oryndaýlary, «Jerebe life» ónerli jastar jobasynyń kontserti jáne jas kompozitor ári kreator Serik Zakariianyń shyǵarmashylyq keshi bar.
Aqtóbe oblysynda búginde 3 myńnan astam mádeniet qyzmetkeri eńbek etedi. «Aqtobe Creative Days» olardyń shyǵarmashylyq áleýetin, óńirlik brendterdi jáne avtorlyq ónimderdi respýblikalyq aýditoriiaǵa tanystyrýǵa múmkindik beredi. Qolóner, sán, ádebiet, teatr, mýzyka jáne IT baǵyttaryn biriktirgen joba dástúrli mádeni mura men zamanaýi kreativti indýstriialardyń ózara bailanysyn kórsetedi.
