Memleket basshysynyń Kaspii teńizi problemalaryn keshendi zertteý jónindegi tapsyrmalaryn júzege asyrý sheńberinde "Qazaq Kaspii teńizi ǵylymi-zertteý institýty" KeAQ-qa Úkimet rezervinen 305 mln teńge bólindi. Premer-ministr Oljas Bektenov tiisti qaýlyǵa qol qoidy, dep habarlaidy Dalanews.kz.
Institýt Memleket basshysy Qasym-Jomart Toqaevtyń tapsyrmasymen Kaspii teńiziniń ekologiialyq máselelerin zertteý maqsatynda quryldy.
Atap aitqanda, ǴZI-diń qyzmet aiasyna:
- balyq qorynyń kólemin baǵalaý, olardy saqtaý ádisteri men tehnologiialaryn ázirleý,
- ihtiofaýnany zertteý,
- itbalyqtardyń jappai qyrylý sebepterin anyqtaý jáne olardyń popýliatsiiasyn saqtaý máseleleri kiredi.
Sonymen qatar teńizdiń gidrologiialyq úderisterin zertteýge jáne onyń deńgeiin baqylaýǵa, klimattyń ózgerýin jáne onyń ekojúiege áserin taldaýǵa, sýdyń sapasy, biologiialyq alýantúrlilik jáne Kaspii teńiziniń qazaqstandyq bóligi men jaǵalaýynyń ózge de parametrleri jónindegi derekterdi jinaý jáne taldaýmen ainalysady.
"Úkimet rezervinen bólingen qarajat institýtty odan ári damytýǵa baǵyttalǵan, gidrobiologiia jáne gidrohimiia, gidrometeorologiia, spýtniktik monitoring zerthanalarynda ǵylymi-zertteý jumystaryn ýaqtyly ári tiimdi júrgizýge, sondai-aq institýtqa júktelgen ózge de mindetterdi oryndaýǵa múmkindik beredi", delingen Úkimet baspasóz qyzmetiniń habarlamasynda.
Aita ketsek,Kaspii teńizi biregei ekojúie jáne sý bioresýrstarynyń asa mańyzdy kózi, sondai-aq batys óńirler men jalpy elimizdiń turaqty damýyna úlken úles qosady. Kaspii teńiziniń Qazaqstan tarapyndaǵy jaǵalaýynyń uzyndyǵy 2320 shaqyrym, bul barlyq Kaspiimańy memleketteri arasyndaǵy eń uzyn jaǵalaý syzyǵy.
Buǵan deiin Qazaqstan men Ázerbaijannyń telekom-operatorlary Kaspii teńiziniń túbimen bailanys jelisin tartqaly jatqanyn jazǵanbyz. 2025 jyly 25 shildede Halyqaralyq ekologiialyq konferentsiiada Qazaqstan Premer-ministri Oljas Bektenov Kaspii mańy elderin Kaspiidiń taiazdanýyna qarsy kúreste yntymaqtastyqqa shaqyrǵan bolatyn.
