مەملەكەت باسشىسىنىڭ كاسپيي تەڭىزى پروبلەمالارىن كەشەندى زەرتتەۋ جونىندەگى تاپسىرمالارىن جۇزەگە اسىرۋ شەڭبەرىندە "قازاق كاسپيي تەڭىزى عىلىمي-زەرتتەۋ ينستيتۋتى" كەاق-قا ۇكىمەت رەزەرۆىنەن 305 ملن تەڭگە ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى، دەپ حابارلايدى Dalanews.kz.
ينستيتۋت مەملەكەت باسشىسى قاسىم-جومارت توقايەۆتىڭ تاپسىرماسىمەن كاسپيي تەڭىزىنىڭ ەكولوگيالىق ماسەلەلەرىن زەرتتەۋ ماقساتىندا قۇرىلدى.
اتاپ ايتقاندا، ءعزي-دىڭ قىزمەت اياسىنا:
- بالىق قورىنىڭ كولەمىن باعالاۋ، ولاردى ساقتاۋ ادىستەرى مەن تەحنولوگيالارىن ازىرلەۋ،
- يحتيوفاۋنانى زەرتتەۋ،
- يتبالىقتاردىڭ جاپپاي قىرىلۋ سەبەپتەرىن انىقتاۋ جانە ولاردىڭ پوپۋلياسياسىن ساقتاۋ ماسەلەلەرى كىرەدى.
سونىمەن قاتار تەڭىزدىڭ گيدرولوگيالىق ۇدەرىستەرىن زەرتتەۋگە جانە ونىڭ دەڭگەيىن باقىلاۋعا، كليماتتىڭ وزگەرۋىن جانە ونىڭ ەكوجۇيەگە اسەرىن تالداۋعا، سۋدىڭ ساپاسى، بيولوگيالىق الۋانتۇرلىلىك جانە كاسپيي تەڭىزىنىڭ قازاقستاندىق بولىگى مەن جاعالاۋىنىڭ وزگە دە پارامەترلەرى جونىندەگى دەرەكتەردى جيناۋ جانە تالداۋمەن اينالىسادى.
"ۇكىمەت رەزەرۆىنەن بولىنگەن قاراجات ينستيتۋتتى ودان ءارى دامىتۋعا باعىتتالعان، گيدروبيولوگيا جانە گيدروحيميا، گيدرومەتەورولوگيا، سپۋتنيكتىك مونيتورينگ زەرتحانالارىندا عىلىمي-زەرتتەۋ جۇمىستارىن ۋاقتىلى ءارى ءتيىمدى جۇرگىزۋگە، سونداي-اق ينستيتۋتقا جۇكتەلگەن وزگە دە مىندەتتەردى ورىنداۋعا مۇمكىندىك بەرەدى"، دەلىنگەن ۇكىمەت باسپا ءسوز قىزمەتىنىڭ حابارلاماسىندا.
ايتا كەتسەك،كاسپيي تەڭىزى بىرەگەي ەكوجۇيە جانە سۋ بيورەسۋرستارىنىڭ اسا ماڭىزدى كوزى، سونداي-اق باتىس وڭىرلەر مەن جالپى ەلىمىزدىڭ تۇراقتى دامۋىنا ۇلكەن ۇلەس قوسادى. كاسپيي تەڭىزىنىڭ قازاقستان تاراپىنداعى جاعالاۋىنىڭ ۇزىندىعى 2320 شاقىرىم، بۇل بارلىق كاسپييماڭى مەملەكەتتەرى اراسىنداعى ەڭ ۇزىن جاعالاۋ سىزىعى.
بۇعان دەيىن قازاقستان مەن ازەربايجاننىڭ تەلەكوم-وپەراتورلارى كاسپيي تەڭىزىنىڭ تۇبىمەن بايلانىس جەلىسىن تارتقالى جاتقانىن جازعانبىز. 2025 جىلى 25 شىلدەدە حالىقارالىق ەكولوگيالىق كونفەرەنسيادا قازاقستان پرەمەر-مينيسترى ولجاس بەكتەنوۆ كاسپيي ماڭى ەلدەرىن كاسپييدىڭ تايازدانۋىنا قارسى كۇرەستە ىنتىماقتاستىققا شاقىرعان بولاتىن.
