Qazaqstan 2025 jyly jeltoqsanda Kaspii Qubyr Konsortsiýmynyń shekteýleri kezinde shamamen 300 myń tonna munaidy basqa baǵyttarǵa jóneltti, dep habarlaidy Dalanews.kz.
"QazMunaiGaz" ulttyq kompaniiasynyń málimetinshe, jyl sońynda Kaspii Qubyr Konsortsiýmy boiynsha munai tasymaldaý shektelýine bailanysty Qazaqstan munaiyn "QazTransOil" AQ (QTO) júiesi arqyly basqa eksporttyq baǵyttarǵa jóneltý boiynsha jedel jumys júrgizilgen.
"Shamamen 300 myń tonna munai kólemi QTO júiesi boiynsha eksporttyq baǵdarlar, sonyń ishinde Germaniia, Qytai, Baký-Tbilisi-Jeihan, Novorossiisk jáne Ýst-Lýga porttary arqyly jetkizý úshin qaita baǵyttaldy. 2026 jylǵy qańtarda Kaspii Qubyr Konsortsiýmy tarapynan munai qabyldaýda saqtalyp otyrǵan shekteýlerdi eskere otyryp, munaidy qaita baǵyttaý jónindegi is-sharalar jalǵasady", - dep jazylǵan habarlamada.
Qazaqstan munaiyn tasymaldaýdyń mynadai qosymsha baǵyttary boiynsha jumys istelip jatyr:
- 2025 jylǵy qorytyndyǵa sáikes Qazaqstan munaiyn Germaniiaǵa (Shvedt qalasyndaǵy munai óńdeý zaýytyna) jetkizý boiynsha ósý dinamikasy baiqalady. Tasymaldaý kólemi - 2,1 mln tonna.
- Aqtaý portynan Baký-Tbilisi-Jeihan baǵdary boiynsha qazaqstandyq munaidyń 1,3 mln tonnasy tasymaldandy.
- Sonymen qatar, Qazaqstan munaiy eksporttyq baǵytqa - Qytai Halyq Respýblikasyna turaqty tasymaldanyp keledi. 2025 jyldyń qorytyndysy boiynsha QHR-ǵa 1,1 mln tonna munai eksporttaldy.
