قازاقستان 2025 جىلى جەلتوقساندا كاسپيي قۇبىر كونسورسيۋمىنىڭ شەكتەۋلەرى كەزىندە شامامەن 300 مىڭ توننا مۇنايدى باسقا باعىتتارعا جونەلتتى، دەپ حابارلايدى Dalanews.kz.
"قازمۇنايگاز" ۇلتتىق كومپانياسىنىڭ مالىمەتىنشە، جىل سوڭىندا كاسپيي قۇبىر كونسورسيۋمى بويىنشا مۇناي تاسىمالداۋ شەكتەلۋىنە بايلانىستى قازاقستان مۇنايىن "قازترانسويل" اق (قتو) جۇيەسى ارقىلى باسقا ەكسپورتتىق باعىتتارعا جونەلتۋ بويىنشا جەدەل جۇمىس جۇرگىزىلگەن.
"شامامەن 300 مىڭ توننا مۇناي كولەمى قتو جۇيەسى بويىنشا ەكسپورتتىق باعدارلار، سونىڭ ىشىندە گەرمانيا، جۇڭگو، باكۋ-تبيليسي-جەيحان، نوۆوروسسييسك جانە ۋست-لۋگا پورتتارى ارقىلى جەتكىزۋ ءۇشىن قايتا باعىتتالدى. 2026 جىلعى قاڭتاردا كاسپيي قۇبىر كونسورسيۋمى تاراپىنان مۇناي قابىلداۋدا ساقتالىپ وتىرعان شەكتەۋلەردى ەسكەرە وتىرىپ، مۇنايدى قايتا باعىتتاۋ جونىندەگى ءىس-شارالار جالعاسادى"، - دەپ جازىلعان حابارلامادا.
قازاقستان مۇنايىن تاسىمالداۋدىڭ مىناداي قوسىمشا باعىتتارى بويىنشا جۇمىس ىستەلىپ جاتىر:
- 2025 جىلعى قورىتىندىعا سايكەس قازاقستان مۇنايىن گەرمانياعا (شۆەدت قالاسىنداعى مۇناي وڭدەۋ زاۋىتىنا) جەتكىزۋ بويىنشا ءوسۋ ديناميكاسى بايقالادى. تاسىمالداۋ كولەمى - 2،1 ملن توننا.
- اقتاۋ پورتىنان باكۋ-تبيليسي-جەيحان باعدارى بويىنشا قازاقستاندىق مۇنايدىڭ 1،3 ملن تونناسى تاسىمالداندى.
- سونىمەن قاتار، قازاقستان مۇنايى ەكسپورتتىق باعىتقا - جۇڭگو حالىق رەسپۋبليكاسىنا تۇراقتى تاسىمالدانىپ كەلەدى. 2025 جىلدىڭ قورىتىندىسى بويىنشا قحر-عا 1،1 ملن توننا مۇناي ەكسپورتتالدى.
