Kaspi óz qosymshasynan "Biz Birgemiz Qazaqstan-dy" shyǵaryp tastady, sóitip bul qorǵa aqsha aýdarý múmkindigi joiyldy,dep habarlaidy Dalanews.kz.
Bul týraly qor naryǵynyń mamany Daniiar Temirbaev Facebook-tegi paraqshasynda jazdy.
"Atalǵan qor basshysynyń aqshany jeke qajettilikterine jumsady degen kúdikpen ustalǵany týraly shyqqan aqparattan soń osyndai sheshim qabyldanǵan shyǵar. Jalpy, bul jaǵdaida qordyń barlyq donattary siiaqty Kaspi-de zardap shegýshi. Sebebi olar bul qorǵa 600 mln teńgeden astam aqsha aýdarǵan. Sý tasqynynan zardap shekkenderge kómektesý úshin qurylǵan bul qaiyrymdylyq qoryna qatysty jaǵymsyz oqiǵa "Qazaqstanda alaiaqtyq degen keremet gúldep-órkendep turǵanyn" taǵy da rastaidy. Eń bastysy, mundai uiymdardy qarjylandyrý bóligine qatysty bizde myqty komplaens (tártipke baǵyný,normalardy buzbaý) joqtyń qasy", dep jazady ol.
Aita ketsek, QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatyr.
Onyń kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilinip, ustalǵany 2024 jyly 14 qarashada belgili boldy.
15 qarashada AMANAT partiiasynyń ókilderi Biz Birgemiz Qazaqstan qaiyrymdylyq qorymen eshqandai bailanysy joq ekenin resmi túrde málimdedi.
16 qarashada Qarjy monitoringi agenttigi Eriktiler qozǵalysynyń belsendisi Perizat Qairatqa qatysty tergeý faktisi boiynsha qosymsha aqparatty jariialady. Agenttik Perizat Qairattyń Palestinaǵa dep aqsha jinap, 200 mln teńgeden asa qarajatty jymqyrǵanyn rastady.
