Qarjylyq monitoring agenttigi Soltústik Qazaqstan oblysy boiynsha departamenti aýyl sharýashylyq óndiristik kooperativi basshysynyń 50 million teńgeden astam sýbsidiiany zańsyz alý shemasyn anyqtady, dep jazady Dalanews.kz.
Negizinen, memleketimiz joǵary sapaly sút óndirisin arttyrý jáne importqa táýeldilikti tómendetý úshin sút-taýar fermalaryn ashýdy belsendi túrde qoldap, yntalandyrýda. Alaida atalǵan óndiristik kooperativiniń basshysy 2019 jyldyń mamyrynan 2020 jyldyń naýryzyna deiingi aralyqta jalǵan qujattardy paidalanyp, sút ónimderin óńdeýge bólingen 50 million teńgeden astam sýbsidiiany zańsyz alǵan.
"Óndiristik shyǵyndardy rastaý úshin aýyl sharýashylyǵy basqarmasyna jeke kásipkerlerden shiki sút satyp alǵany úshin ózara esep aiyrysý týraly jalǵan qujattar jáne mai óndirisi týraly qasaqana jalǵan aqparattar berip kelgen. Nátijesinde sot sút jetkizý mámilelerin zańsyz dep tanydy. Qarjylyq tergeý nátijesinde, zańsyz alynǵan sýbsidiialarǵa kúdikti "TOYOTA LAND CRUISER PRADO 150" markaly avtokólik satyp alǵany anyqtaldy, ol múmkin bolatyn tárkileýden jasyrý maqsatynda senimdi adamǵa rásimdelgen", delingen agenttik túsiniktemesinde.
Sottyń sanktsiiasymen atalǵan avtokólik turaqqa qoiyldy.
Kúdiktige qatysty sot 2 aiǵa "qamaýǵa alý" túrinde bultartpaý sharasyn taǵaiyndady.
Budan ózge barlyq aqparat QR QPK 201-babyna sáikes tergeý múddesinde jariialaýǵa jatpaidy.
