قارجىلىق مونيتورينگ اگەنتتىگى سولتۇستىك قازاقستان وبلىسى بويىنشا دەپارتامەنتى اۋىل شارۋاشىلىق وندىرىستىك كووپەراتيۆى باسشىسىنىڭ 50 ميلليون تەڭگەدەن استام سۋبسيديانى زاڭسىز الۋ سحەماسىن انىقتادى، دەپ جازادى Dalanews.kz.
نەگىزىنەن، مەملەكەتىمىز جوعارى ساپالى ءسۇت ءوندىرىسىن ارتتىرۋ جانە يمپورتقا تاۋەلدىلىكتى تومەندەتۋ ءۇشىن ءسۇت-تاۋار فەرمالارىن اشۋدى بەلسەندى تۇردە قولداپ، ىنتالاندىرۋدا. الايدا اتالعان وندىرىستىك كووپەراتيۆىنىڭ باسشىسى 2019 جىلدىڭ مامىرىنان 2020 جىلدىڭ ناۋرىزىنا دەيىنگى ارالىقتا جالعان قۇجاتتاردى پايدالانىپ، ءسۇت ونىمدەرىن وڭدەۋگە بولىنگەن 50 ميلليون تەڭگەدەن استام سۋبسيديانى زاڭسىز العان.
"وندىرىستىك شىعىنداردى راستاۋ ءۇشىن اۋىل شارۋاشىلىعى باسقارماسىنا جەكە كاسىپكەرلەردەن شيكى ءسۇت ساتىپ العانى ءۇشىن ءوزارا ەسەپ ايىرىسۋ تۋرالى جالعان قۇجاتتار جانە ماي ءوندىرىسى تۋرالى قاساقانا جالعان اقپاراتتار بەرىپ كەلگەن. ناتيجەسىندە سوت ءسۇت جەتكىزۋ مامىلەلەرىن زاڭسىز دەپ تانىدى. قارجىلىق تەرگەۋ ناتيجەسىندە، زاڭسىز الىنعان سۋبسيديالارعا كۇدىكتى "TOYOTA LAND CRUISER PRADO 150" ماركالى اۆتوكولىك ساتىپ العانى انىقتالدى، ول مۇمكىن بولاتىن تاركىلەۋدەن جاسىرۋ ماقساتىندا سەنىمدى ادامعا راسىمدەلگەن"، دەلىنگەن اگەنتتىك تۇسىنىكتەمەسىندە.
سوتتىڭ سانكسياسىمەن اتالعان اۆتوكولىك تۇراققا قويىلدى.
كۇدىكتىگە قاتىستى سوت 2 ايعا "قاماۋعا الۋ" تۇرىندە بۇلتارتپاۋ شاراسىن تاعايىندادى.
بۇدان وزگە بارلىق اقپارات ق ر قپك 201-بابىنا سايكەس تەرگەۋ مۇددەسىندە جاريالاۋعا جاتپايدى.
