Kásipker, Ulttyq quryltai múshesi Syrymbek Taý áleýmettik jelilerde mádenietke jat, jaǵymsyz kontenttiń kóbeiip ketkenin aityp, bul salaǵa qatań shekteý engizý qajet ekenin málimdedi, dep habarlaidy Dalanews.kz.
“Shekteý qoiatyn kez keldi deimin. Qalai emin-erkin boqtyq sózder aitylyp júr? Al ony bes jastaǵy baladan seksen jastaǵy qariialarymyzǵa deiin tyńdai beredi”, - deidi ol.
Kásipker mundai ortada sóz bostandyǵy shekten shyqpaýy tiis dep esepteidi.
“Boqtyq sózder, arsyz nasihattar, jalańashtanǵan adamdar - munyń bárin ózimizdiń ulttyq qundylyǵymyzǵa, zamanymyzǵa sai qaita qarastyrýymyz kerek. Ondai nárselerge shekteý qoiý qajet”, – dep qosty ol.
Syrymbek Taýdyń pikirinshe, belgilengen talaptarǵa baǵynbaǵan jaǵdaida ákimshilik sharalar kúsheitilýi tiis. Atap aitqanda, qoǵamdyq jumysqa tartý, aiyppul salý, tipti qajet bolǵan jaǵdaida qamaýǵa alý da qarastyrylýy múmkin.
“Eger buǵan qazir shekteý qoimasaq, boqtyq sózder erteń qoǵamda kúndelikti qoldanylatyn qalypty tilge ainalyp ketýi yqtimal”, – dedi depýtat.
Sonymen qatar ol áleýmettik jelilerdegi jalǵan akkaýnttar máselesine de nazar aýdardy. Depýtattyń aitýynsha, qazirgi tańda aty-jóni belgisiz akkaýnttar arqyly jala jabý men jalǵan aqparat taratý jiilegen.
“Álemdik tájiribede Meta kompaniiasyna resmi hat joldap, jalǵan akkaýnttardy belgili bir elde paidalanýǵa shekteý qoiý tájiribesi bar. Qazaqstanda da jalǵan akkaýnttan shyqqan aqparatty derekkóz retinde qabyldamaý tetigin engizý kerek. Qazir halyq jalǵan aqparatqa tez senedi, al onyń kózine qarasań – jalǵan akkaýnt”, – dep atap ótti ol.
Depýtat bul máseleler ulttyq aqparattyq qaýipsizdik pen qoǵamnyń rýhani ahýalyna tikelei áser etetinin aityp, ýákiletti organdardy naqty sharalar qabyldaýǵa shaqyrdy.
