كاسىپكەر، ۇلتتىق قۇرىلتاي مۇشەسى سىرىمبەك تاۋ الەۋمەتتىك جەلىلەردە مادەنيەتكە جات، جاعىمسىز كونتەنتتىڭ كوبەيىپ كەتكەنىن ايتىپ، بۇل سالاعا قاتاڭ شەكتەۋ ەنگىزۋ قاجەت ەكەنىن مالىمدەدى، دەپ حابارلايدى Dalanews.kz.
“شەكتەۋ قوياتىن كەز كەلدى دەيمىن. قالاي ەمىن-ەركىن بوقتىق سوزدەر ايتىلىپ ءجۇر؟ ال ونى بەس جاستاعى بالادان سەكسەن جاستاعى قاريالارىمىزعا دەيىن تىڭداي بەرەدى”، - دەيدى ول.
كاسىپكەر مۇنداي ورتادا ءسوز بوستاندىعى شەكتەن شىقپاۋى ءتيىس دەپ ەسەپتەيدى.
“بوقتىق سوزدەر، ارسىز ناسيحاتتار، جالاڭاشتانعان ادامدار - مۇنىڭ ءبارىن ءوزىمىزدىڭ ۇلتتىق قۇندىلىعىمىزعا، زامانىمىزعا ساي قايتا قاراستىرۋىمىز كەرەك. ونداي نارسەلەرگە شەكتەۋ قويۋ قاجەت”، – دەپ قوستى ول.
سىرىمبەك تاۋدىڭ پىكىرىنشە، بەلگىلەنگەن تالاپتارعا باعىنباعان جاعدايدا اكىمشىلىك شارالار كۇشەيتىلۋى ءتيىس. اتاپ ايتقاندا، قوعامدىق جۇمىسقا تارتۋ، ايىپپۇل سالۋ، ءتىپتى قاجەت بولعان جاعدايدا قاماۋعا الۋ دا قاراستىرىلۋى مۇمكىن.
“ەگەر بۇعان ءقازىر شەكتەۋ قويماساق، بوقتىق سوزدەر ەرتەڭ قوعامدا كۇندەلىكتى قولدانىلاتىن قالىپتى تىلگە اينالىپ كەتۋى ىقتيمال”، – دەدى دەپۋتات.
سونىمەن قاتار ول الەۋمەتتىك جەلىلەردەگى جالعان اككاۋنتتار ماسەلەسىنە دە نازار اۋداردى. دەپۋتاتتىڭ ايتۋىنشا، قازىرگى تاڭدا ءاتى-جونى بەلگىسىز اككاۋنتتار ارقىلى جالا جابۋ مەن جالعان اقپارات تاراتۋ جيىلەگەن.
“الەمدىك تاجىريبەدە Meta كومپانياسىنا رەسمي حات جولداپ، جالعان اككاۋنتتاردى بەلگىلى ءبىر ەلدە پايدالانۋعا شەكتەۋ قويۋ تاجىريبەسى بار. قازاقستاندا دا جالعان اككاۋنتتان شىققان اقپاراتتى دەرەككوز رەتىندە قابىلداماۋ تەتىگىن ەنگىزۋ كەرەك. ءقازىر حالىق جالعان اقپاراتقا تەز سەنەدى، ال ونىڭ كوزىنە قاراساڭ – جالعان اككاۋنت”، – دەپ اتاپ ءوتتى ول.
دەپۋتات بۇل ماسەلەلەر ۇلتتىق اقپاراتتىق قاۋىپسىزدىك پەن قوعامنىڭ رۋحاني احۋالىنا تىكەلەي اسەر ەتەتىنىن ايتىپ، ۋاكىلەتتى ورگانداردى ناقتى شارالار قابىلداۋعا شاقىردى.
