Beısenbide Qazaqstan baǵaly qaǵazdar naryǵyndaǵy saýda-sattyqta senimdi ósim tirkelip, KASE ındeksi 5 191,73 tarmaqqa (+0,8%) kóterildi. Jergilikti ınvestorlardy bul aptada qandaı aksıalar, onda da nege qyzyǵýshylyq týǵyzǵanyn Dalanews.kz saıtynan oqyńyz.
Sonymen ósim kóshbasynda Qazatomónerkásiptiń (+2,3%) jáne bank sektoryndaǵy Kaspi (+2,1%), Halyq Banki (+1,7%), BSK (+0,3%) aksıalary tur.
Jergilikti ınvestorlar búkil álemde atom energetıkasyna degen qyzyǵýshylyqtyń artýy aıasynda ýranǵa suranys joǵarylaıdy dep topshylaıtyn sekildi. Onyń ústine kúni keshe ETF URA 5% ósimdi kórsetti. ETF URA ýran óndirisimen baılanysty álemdegi kompanıalarǵa ınvestısıa jasaý úshin qurylǵan bırja qory ekenin basa atap ótelik. Onyń aktıvinde Qazatomónerkásiptiń de aksıalary (4.7%) bar
Al Kaspi tobynyń aǵymdaǵy jyldyń toǵyz aıynda jasalǵan operasıalyq nátıjeleri kelesi aptada jarıalanady. Odan da jaqsy nátıje kútiletinge uqsaıdy. Investorlar qýana qabyldaǵan sondaı jańalyqtyń biri - Kaspi tobynyń jetekshi túrik marketpleısi Hepsiburada-nyń 65% aksıasyn satyp alýy. Hepsiburada - 10 myń qyzmetker, 12 mln klıenti bar úlken kompanıa. Árıne,aksıalaryn satyp alý arqyly kompanıa tabysyna ortaqtasatyn ınvestorlar úshin bul - jaǵymdy jańalyq.
Boryshkerlik baǵaly qaǵazdar naryǵyna keletin bolsaq, KASE-de QR Qarjy mınıstrliginiń jańadan ornalastyrǵan onjyldyq eýrooblıgasıalary (1,5 mlrd dollar, jyldyq syıaqy mólsherlemesi - 4,714%) boıynsha saýda-sattyqtyń bastalýy, sonymen qatar QFB-nyń bir jyldyq oblıgasıalaryn ornalastyrýy (7,0 mlrd teńge, jyldyq syıaqy mólsherlemesi - 13,22%) ınvestorlardyń nazar aýdarǵanyn ataı ótken jón.
