Burynǵy UQK tóraǵasy Kárim Másimovtiń qyzy Tamilla Kárim Máskeýde eks-kúieýi Azamat Qapenovke qarsy qozǵalǵan sot protsesinde jeńildi, dep habarlaidy Dalanews.kz.
Tamilla Kárim men Azamat Qapenov 2013–2019 jyldar aralyǵynda resmi nekede bolǵan. Ekeýi de Resei Federatsiiasynyń azamaty. 2023 jyly Tamilla Kárim birge jinaǵan múlikti bólý jóninde sotqa talap aryz túsirgen.
Alaida sot materialdaryna sáikes, eks-jubai 2020 jyly ortaq múlikti bólisý týraly kelisimge kelgen. Bul kelisim boiynsha, Kapenovtiń menshiginde Máskeýdiń elitaly aýdandarynyń biri Horoshevskoe Serebrianyi Borda ornalasqan 1200 sharshy metrlik ǵimarat pen oǵan tiesili 2900 sharshy metr jer telimi qalǵan. Bul jyljymaityn múliktiń kadastrlyq quny qazirgi baǵammen 750 million teńgeden asady.
Sot derekterinde kórsetilgendei, kelisimniń mazmuny eki tarappen bes ai boiy talqylanyp, ózara maquldanǵan. Degenmen úsh jyldan keiin, iaǵni 2023 jyly, Tamilla Kárim osy kelisimdi qaita qaraýdy surap, sotqa júgingen. Alaida sol ýaqytta daýly múlik Qapenovtiń atymen úshinshi tulǵa — Cholpon Sheishekeevaǵa satý arqyly berilgen.
Máskeýdiń Meshan aýdandyq soty talapkerdiń ýájin negizsiz dep taýyp, múlikti bólý týraly kelisimdi zańdy dep tanydy. Tamilla Kárim bul sheshimge apelliatsiialyq shaǵym túsirgen, biraq qujattar tolyq usynylmaǵandyqtan, shaǵym 2025 jyldyń 26 qyrkúiegine deiin qaraýsyz qaldyryldy.
Aita keteiik, 2024 jyly Azamat Qapenov aldymen Reseide, keiin Qazaqstanda izdeý jariialanǵan tulǵalar tizimine endi. Qazaqstanda oǵan qatysty alaiaqtyq deregi boiynsha qylmystyq is qozǵalyp, syrttai qamaýǵa alý týraly sot sheshimi shyqqan. Sol jyldyń sońynda onyń baýyry Meder Qapenovke de Reseide izdeýge jariialandy. Aǵaiyndy Qapenovter Qyrǵyzstan týmasy, alaida Resei tarapy olardyń naqty qandai qylmysqa kúdikti ekenin jariialamaǵan.
Eske salsaq, Kárim Másimov 2023 jyly sáýirde 18 jylǵa sottaldy. Ol memleketke opasyzdyq jasaý, bilikti kúshpen basyp alýǵa árekettený, qyzmettik ókiletin asyra paidalaný baptary boiynsha kináli dep tanylǵan.
2024 jyldyń maýsymynda ol Prezident Qasym-Jomart Toqaevtan keshirim surap ótinish joldaǵanymen, bul ýáji qanaǵattandyrylmaǵan. Sonymen qatar buǵan deiin Másimovtiń reseilik astrologqa 200 myń dollar tólegeni týraly derek te jariia bolǵan edi.
