بۇرىنعى ۇقك ءتوراعاسى كارىم ءماسىموۆتىڭ قىزى تاميللا كارىم ماسكەۋدە ەكس-كۇيەۋى ازامات قاپەنوۆكە قارسى قوزعالعان سوت پروسەسىندە جەڭىلدى، دەپ حابارلايدى Dalanews.kz.
تاميللا كارىم مەن ازامات قاپەنوۆ 2013–2019 جىلدار ارالىعىندا رەسمي نەكەدە بولعان. ەكەۋى دە رەسەي فەدەراسياسىنىڭ ازاماتى. 2023 جىلى تاميللا كارىم بىرگە جيناعان مۇلىكتى ءبولۋ جونىندە سوتقا تالاپ ارىز تۇسىرگەن.
الايدا سوت ماتەريالدارىنا سايكەس، ەكس-جۇباي 2020 جىلى ورتاق مۇلىكتى ءبولىسۋ تۋرالى كەلىسىمگە كەلگەن. بۇل كەلىسىم بويىنشا، كاپەنوۆتىڭ مەنشىگىندە ماسكەۋدىڭ ەليتالى اۋداندارىنىڭ ءبىرى حوروشيەۆسكوە سەرەبريانىي بوردا ورنالاسقان 1200 شارشى مەترلىك عيمارات پەن وعان تيەسىلى 2900 شارشى مەتر جەر تەلىمى قالعان. بۇل جىلجىمايتىن مۇلىكتىڭ كاداسترلىق قۇنى قازىرگى باعاممەن 750 ميلليون تەڭگەدەن اسادى.
سوت دەرەكتەرىندە كورسەتىلگەندەي، كەلىسىمنىڭ مازمۇنى ەكى تاراپپەن بەس اي بويى تالقىلانىپ، ءوزارا ماقۇلدانعان. دەگەنمەن ءۇش جىلدان كەيىن، ياعني 2023 جىلى، تاميللا كارىم وسى كەلىسىمدى قايتا قاراۋدى سۇراپ، سوتقا جۇگىنگەن. الايدا سول ۋاقىتتا داۋلى مۇلىك قاپەنوۆتىڭ اتىمەن ءۇشىنشى تۇلعا — چولپون شەيشەكەيەۆاعا ساتۋ ارقىلى بەرىلگەن.
ماسكەۋدىڭ مەششان اۋداندىق سوتى تالاپكەردىڭ ءۋاجىن نەگىزسىز دەپ تاۋىپ، مۇلىكتى ءبولۋ تۋرالى كەلىسىمدى زاڭدى دەپ تانىدى. تاميللا كارىم بۇل شەشىمگە اپەللياسيالىق شاعىم تۇسىرگەن، ءبىراق قۇجاتتار تولىق ۇسىنىلماعاندىقتان، شاعىم 2025 جىلدىڭ 26 قىركۇيەگىنە دەيىن قاراۋسىز قالدىرىلدى.
ايتا كەتەيىك، 2024 جىلى ازامات قاپەنوۆ الدىمەن رەسەيدە، كەيىن قازاقستاندا ىزدەۋ جاريالانعان تۇلعالار تىزىمىنە ەندى. قازاقستاندا وعان قاتىستى الاياقتىق دەرەگى بويىنشا قىلمىستىق ءىس قوزعالىپ، سىرتتاي قاماۋعا الۋ تۋرالى سوت شەشىمى شىققان. سول جىلدىڭ سوڭىندا ونىڭ باۋىرى مەدەر قاپەنوۆكە دە رەسەيدە ىزدەۋگە جاريالاندى. اعايىندى قاپەنوۆتەر قىرعىزستان تۋماسى، الايدا رەسەي تاراپى ولاردىڭ ناقتى قانداي قىلمىسقا كۇدىكتى ەكەنىن جاريالاماعان.
ەسكە سالساق، كارىم ءماسىموۆ 2023 جىلى ساۋىردە 18 جىلعا سوتتالدى. ول مەملەكەتكە وپاسىزدىق جاساۋ، بيلىكتى كۇشپەن باسىپ الۋعا ارەكەتتەنۋ، قىزمەتتىك وكىلەتىن اسىرا پايدالانۋ باپتارى بويىنشا كىنالى دەپ تانىلعان.
2024 جىلدىڭ ماۋسىمىندا ول پرەزيدەنت قاسىم-جومارت توقايەۆتان كەشىرىم سۇراپ ءوتىنىش جولداعانىمەن، بۇل ءۋاجى قاناعاتتاندىرىلماعان. سونىمەن قاتار بۇعان دەيىن ءماسىموۆتىڭ رەسەيلىك استرولوگقا 200 مىڭ دوللار تولەگەنى تۋرالى دەرەك تە جاريا بولعان ەدى.
