Máselen, Elbasy N.Nazarbaevtyń bastamasymen qurylǵan «Biz birgemiz» qoǵamdyq qory arqyly 41 myń az qamtylǵan otbasy kómek alǵan. Al, Prezidenttiń tapsyrmasy boiynsha tótenshe jaǵdai jáne karantin kezinde kirisin ýaqytsha joǵaltqan 428 myńnan astam azamatqa qoldaý kórsetilgen. Iaǵni, birinshi kezeńde 285 myńnan astam adamǵa, ekinshi kezeńde 143 myńnan astam azamatqa 42 500 teńgeden kómek berildi. Odan bólek, 28 myńnan astam azamattyń kommýnaldyq shyǵyny memlekettik biýdjetten óteldi.
Budan bólek, Shymkent qalasy boiynsha 26 myńnan astam kásipkerlik sýbektisi múlik jáne tabys salyqtarynan bosatylǵan bolsa, 1482 kásipkerdiń 13 mlrd. teńge nesie tólemderi keiinge shegerildi. Indetpen kúresken meditsina qyzmetkerlerine túrli ótem-tólemder qarastyryldy.
Murat Áitenov óz sózinde pandemiia adam balasyna úlken qaýip tóndirip, ómir súrý daǵdysyn ózgertkenin jáne bul densaýlyq saqtaý salasyna úlken synaq bolǵanyn aitty.
«Indet Qazaqstandy da ainalyp ótken joq. Osyndai qiyn sátte alǵy shepte júrgen meditsina, politsiia, tótenshe jaǵdailar qyzmetkerlerine, áskeriler men eriktilerge, túsinistik tanytyp, jaqynyna janashyr bolǵan árbir azamatqa alǵys aitamyn! Synaq saǵymyzdy syndyrǵan joq, kerisinshe biriktirdi. Kemshil tustarymyzdy kórdik, jańa baǵdar aldyq, qarapaiym qarym-qatynastyń qundylyǵyn túsindik, toi-dýmandap júretin beibit zamannyń baǵasyn bildik», -dedi qala ákimi.
Esterińizge salsaq, ákim esebi tikelei efir arqyly «Ońtústik», «Otyrar», «Aiǵaq» telearnalary men ákimdiktiń resmi áleýmettik jelilerinde kórsetilýde. Turǵyndar suraqtary men usynystaryn 109 telefonyna habarlasyp qoiýǵa nemese áleýmettik jeli arqyly jazýǵa bolady.
