Dalanews.kz búginde Oral qalasyndaǵy №5 emhanaǵa basshylyq etetin Timýr myrzaǵa habarlasyp, otandyq meditsinanyń jai-japsary tóńireginde az-kem áńgime qurdy.
Aldymen bizdiń keiipkerimizdi tanystyra ketkenimiz durys bolar. Timýr Ájiǵaliev 2019 jyly el kóleminde "Úzdik jas dáriger" atanyp, sol jyly Prezidenttik rezervke kirdi.
"Dárigerliktiń qanshalyqty aýyr, jaýapty kásip ekenin aityp jatýdyń ózi artyq. Bul salada myqty mamanǵa ainalý úshin meditsinanyń otymen kirip, kúlimen shyǵýǵa daiyn bolý qajet. Muny ómirlik mektep dep ataidy.
Óz basym jas dárigerlerdi aýylǵa jiberip, biliktiligin kóterý, tájiribesin shyńdaý tásilin quptaityn azamattardyń birimin. Óz basym osy ótkelden óttim. Bókeiorda aýdanynda kásibi qyzmetimdi bastap, mol tájiribe jinadym", – deidi dáriger.
Timýr Prezidenttik kadrlyq rezervtiń quramyna ońailyqpen kirgen joq. Mundai jetistikke jetýde talmai eńbektenip, únemi izdenis ústinde júrdi. 2013 - 2016 jyldary Bókeiordasyndaǵy ortalyq aýrýhanada hirýrg bolyp qyzmet atqarǵan ol atalǵan kezeńniń aýyrtpalyǵyn kelesidei etip eske alady.
"Jas dárigerlerdiń kópshiligi oblystan, qaladan uzaǵysy kelmeidi. Kópshiligi aýdandyq jerde ózine júkteler jaýapkershiliktiń joǵary bolatynyn túsinedi, sol sebepti aýdan-aýyldarǵa barýdan bas tartyp jatady. Negizi, bul qate úrdis.
Shalǵaida jumys isteitin dáriger ómirdiń ashysy men tushysyn, ystyǵy men sýyǵyn sezinedi, halyqpen sóilesip úirenedi. Eń bastysy sheshim qabyldaityn qabiletin jetildiredi", – deidi maman.
Onyń atap ótkenindei shalǵaida jumys istep, tájiribe jinaǵan dárigerler ózinen ótili úlken áriptesterinen aqyl surap, arqalana almaidy. Ár ýaqytta óziniń túisigine senip, mańyzdy sheshim qabyldaidy. Bul óz kezeginde meditsina mamanynyń dáriger retinde shyńdalýyna jol ashady.
"Óńirdegi áriptesterim meni densaýlyq saqtaý salasynyń menedjeri retinde qabyldaidy. Sebebi, atalǵan salanyń kem-ketigin jaqsy bilemin. Ilgeride aitqandai dárigerlik jumystyń barlyq baspaldaǵynan óttim.
2019 jyly "Senim" densaýlyq saqtaý júiesine qarasty jastar keńesiniń tóraǵasy bolyp taǵaiyndaldym.
Óz basym dárigerler úzdiksiz oqyp, toqýy kerek dep esepteimin. Sonyń esebinen maman daǵdarysqa ushyramaidy. Árdaiym kásibi biligin jetildirgen dáriger suranystan qalmaidy. Álbette, bul printsipti aldymen ózime qoldanamyn. Dárigerlik mashyǵymdy damytýǵa múmkindik beretin treningterden qalys qalǵan emespin.
Sonyń arqasynda 2019 jyly "Úzdik jas dáriger" atandym. Keiin táýekelge bel býyp, Prezidenttik kadrlyq rezervke kirýge talpyndym. Bul áreketim de berekeli boldy. Osy baiqaýda iriktelgen 300 kadrdyń quramyna engenim men úshin zor motivatsiia", – deidi maman.
Timýrdyń atap ótkenindei osynaý rezervke ótken jastardyń barlyǵynda Jańa Qazaqstandy qurýǵa degen umtylys bar. Sonyń ishinde meditsina salasy boiynsha iriktelgen mamandar elimizdegi meditsinanyń deńgeiin álemdik standartqa beiimdeýge múddeli.
"Meditsinadaǵy saqtandyrý júiesi, osy saladaǵy biznes-úrdisterdi durys jolǵa qoiǵan kezde medkómektiń sapasy pen qoljetimdiligi jaqsarady. Bul týraly prezident Toqaevqa da óz pikirimdi aitqanmyn. Meditsinalyq servistiń túzelýi halyqtyń otandyq mamandarǵa degen senimin arttyrady. Ainalyp kelgende munyń barlyǵy eldiń kóńil-kúiine, qoǵamdaǵy atmosferaǵa oń áser etetin faktor", – deidi maman.
