Dalanews.kz بٷگٸندە ورال قالاسىنداعى №5 ەمحاناعا باسشىلىق ەتەتٸن تيمۋر مىرزاعا حابارلاسىپ, وتاندىق مەديتسينانىڭ جاي-جاپسارى تٶڭٸرەگٸندە از-كەم ەڭگٸمە قۇردى.
الدىمەن بٸزدٸڭ كەيٸپكەرٸمٸزدٸ تانىستىرا كەتكەنٸمٸز دۇرىس بولار. تيمۋر ەجٸعاليەۆ 2019 جىلى ەل كٶلەمٸندە "ٷزدٸك جاس دەرٸگەر" اتانىپ, سول جىلى پرەزيدەنتتٸك رەزەرۆكە كٸردٸ.
"دەرٸگەرلٸكتٸڭ قانشالىقتى اۋىر, جاۋاپتى كەسٸپ ەكەنٸن ايتىپ جاتۋدىڭ ٶزٸ ارتىق. بۇل سالادا مىقتى مامانعا اينالۋ ٷشٸن مەديتسينانىڭ وتىمەن كٸرٸپ, كٷلٸمەن شىعۋعا دايىن بولۋ قاجەت. مۇنى ٶمٸرلٸك مەكتەپ دەپ اتايدى.
ٶز باسىم جاس دەرٸگەرلەردٸ اۋىلعا جٸبەرٸپ, بٸلٸكتٸلٸگٸن كٶتەرۋ, تەجٸريبەسٸن شىڭداۋ تەسٸلٸن قۇپتايتىن ازاماتتاردىڭ بٸرٸمٸن. ٶز باسىم وسى ٶتكەلدەن ٶتتٸم. بٶكەيوردا اۋدانىندا كەسٸبي قىزمەتٸمدٸ باستاپ, مول تەجٸريبە جينادىم", – دەيدٸ دەرٸگەر.
تيمۋر پرەزيدەنتتٸك كادرلىق رەزەرۆتٸڭ قۇرامىنا وڭايلىقپەن كٸرگەن جوق. مۇنداي جەتٸستٸككە جەتۋدە تالماي ەڭبەكتەنٸپ, ٷنەمٸ ٸزدەنٸس ٷستٸندە جٷردٸ. 2013 - 2016 جىلدارى بٶكەيورداسىنداعى ورتالىق اۋرۋحانادا حيرۋرگ بولىپ قىزمەت اتقارعان ول اتالعان كەزەڭنٸڭ اۋىرتپالىعىن كەلەسٸدەي ەتٸپ ەسكە الادى.
"جاس دەرٸگەرلەردٸڭ كٶپشٸلٸگٸ وبلىستان, قالادان ۇزاعىسى كەلمەيدٸ. كٶپشٸلٸگٸ اۋداندىق جەردە ٶزٸنە جٷكتەلەر جاۋاپكەرشٸلٸكتٸڭ جوعارى بولاتىنىن تٷسٸنەدٸ, سول سەبەپتٸ اۋدان-اۋىلدارعا بارۋدان باس تارتىپ جاتادى. نەگٸزٸ, بۇل قاتە ٷردٸس.
شالعايدا جۇمىس ٸستەيتٸن دەرٸگەر ٶمٸردٸڭ اششىسى مەن تۇششىسىن, ىستىعى مەن سۋىعىن سەزٸنەدٸ, حالىقپەن سٶيلەسٸپ ٷيرەنەدٸ. ەڭ باستىسى شەشٸم قابىلدايتىن قابٸلەتٸن جەتٸلدٸرەدٸ", – دەيدٸ مامان.
ونىڭ اتاپ ٶتكەنٸندەي شالعايدا جۇمىس ٸستەپ, تەجٸريبە جيناعان دەرٸگەرلەر ٶزٸنەن ٶتٸلٸ ٷلكەن ەرٸپتەستەرٸنەن اقىل سۇراپ, ارقالانا المايدى. ەر ۋاقىتتا ٶزٸنٸڭ تٷيسٸگٸنە سەنٸپ, ماڭىزدى شەشٸم قابىلدايدى. بۇل ٶز كەزەگٸندە مەديتسينا مامانىنىڭ دەرٸگەر رەتٸندە شىڭدالۋىنا جول اشادى.
"ٶڭٸردەگٸ ەرٸپتەستەرٸم مەنٸ دەنساۋلىق ساقتاۋ سالاسىنىڭ مەنەدجەرٸ رەتٸندە قابىلدايدى. سەبەبٸ, اتالعان سالانىڭ كەم-كەتٸگٸن جاقسى بٸلەمٸن. ٸلگەرٸدە ايتقانداي دەرٸگەرلٸك جۇمىستىڭ بارلىق باسپالداعىنان ٶتتٸم.
2019 جىلى "Senim" دەنساۋلىق ساقتاۋ جٷيەسٸنە قاراستى جاستار كەڭەسٸنٸڭ تٶراعاسى بولىپ تاعايىندالدىم.
ٶز باسىم دەرٸگەرلەر ٷزدٸكسٸز وقىپ, توقۋى كەرەك دەپ ەسەپتەيمٸن. سونىڭ ەسەبٸنەن مامان داعدارىسقا ۇشىرامايدى. ەردايىم كەسٸبي بٸلٸگٸن جەتٸلدٸرگەن دەرٸگەر سۇرانىستان قالمايدى. ەلبەتتە, بۇل پرينتسيپتٸ الدىمەن ٶزٸمە قولدانامىن. دەرٸگەرلٸك ماشىعىمدى دامىتۋعا مٷمكٸندٸك بەرەتٸن ترەنينگتەردەن قالىس قالعان ەمەسپٸن.
سونىڭ ارقاسىندا 2019 جىلى "ٷزدٸك جاس دەرٸگەر" اتاندىم. كەيٸن تەۋەكەلگە بەل بۋىپ, پرەزيدەنتتٸك كادرلىق رەزەرۆكە كٸرۋگە تالپىندىم. بۇل ەرەكەتٸم دە بەرەكەلٸ بولدى. وسى بايقاۋدا ٸرٸكتەلگەن 300 كادردىڭ قۇرامىنا ەنگەنٸم مەن ٷشٸن زور موتيۆاتسييا", – دەيدٸ مامان.
تيمۋردىڭ اتاپ ٶتكەنٸندەي وسىناۋ رەزەرۆكە ٶتكەن جاستاردىڭ بارلىعىندا جاڭا قازاقستاندى قۇرۋعا دەگەن ۇمتىلىس بار. سونىڭ ٸشٸندە مەديتسينا سالاسى بويىنشا ٸرٸكتەلگەن ماماندار ەلٸمٸزدەگٸ مەديتسينانىڭ دەڭگەيٸن ەلەمدٸك ستاندارتقا بەيٸمدەۋگە مٷددەلٸ.
"مەديتسيناداعى ساقتاندىرۋ جٷيەسٸ, وسى سالاداعى بيزنەس-ٷردٸستەردٸ دۇرىس جولعا قويعان كەزدە مەدكٶمەكتٸڭ ساپاسى پەن قولجەتٸمدٸلٸگٸ جاقسارادى. بۇل تۋرالى پرەزيدەنت توقاەۆقا دا ٶز پٸكٸرٸمدٸ ايتقانمىن. مەديتسينالىق سەرۆيستٸڭ تٷزەلۋٸ حالىقتىڭ وتاندىق ماماندارعا دەگەن سەنٸمٸن ارتتىرادى. اينالىپ كەلگەندە مۇنىڭ بارلىعى ەلدٸڭ كٶڭٸل-كٷيٸنە, قوعامداعى اتموسفەراعا وڭ ەسەر ەتەتٸن فاكتور", – دەيدٸ مامان.
