İshki ister mınıstrligi azamattarǵa shuǵyl eskertý jasady. Keıingi kezde jasandy ıntellekt tehnologıalaryn qoldaný arqyly jasalatyn ınternet alaıaqtyqtar tirkelgen, dep habarlaıdy Dalanews.kz.

Kúdiktiler ózderin quqyq qorǵaý organdarynyń qyzmetkerleri, bank sektorynyń ókilderi jáne basqa uıymdardyń mamandary retinde kórsetý úshin uqsas sýretterdi, aýdıo jáne vıdeolardy jasaýy múmkin. Belgisiz bireýler jalǵan vıdeo men daýysty paıdalanyp, ózderin polısıa qyzmetkerleri, ulttyq qaýipsizdik organdary nemese bankterdiń qaýipsizdik qyzmetiniń ókilderi retinde tanystyratyn jaǵdaılar tirkelgen. Olar azamattardy aqshany shuǵyl túrde "qaýipsiz shottarǵa" aýdarýǵa kóndiredi. Sonymen qatar, resmı habarlamalarǵa uqsas etip jalǵan habarlamalar men qujattar jiberý, memlekettik organdar nemese qarjy uıymdary ókilderimen baılanys ornatqandaı áser qaldyratyn avtomattandyrylǵan servıster men chat bottardy paıdalaný derekteri de kezdesken.

İshki ister mınıstrligi quqyq qorǵaý organdary men bank qyzmetkerleri eshqashan beıneqońyraý arqyly aqsha aýdarýdy talap etpeıtinin, qupıa málimetti suramaıtynyn jáne telefon arqyly qarjy operasıalaryn júrgizýdi usynbaıtynyn eskertti.

"Alaıaqtyqtyń aldyn alý úshin beıtanys adamdardyń aqsha aýdarýǵa qatysty nusqaýyn oryndamańyzdar, jeke jáne bank deregin bermeńizder, sondaı-aq, aqparatty resmı derekkózder arqyly tekserińizder", - dedi İİM kıberqylmysqa qarsy is-qımyl departamentiniń basqarma bastyǵy Beıbit Birjanov.