Astana qalasynyń qylmystyq ister jónindegi aýdanaralyq soty mektep direktory S. men bas esepshi A.-ǵa qatysty úkim shyǵardy, dep habarlaidy Dalanews.kz.
Tergeý deregine sai 2015–2024 jyldary olar mekemede is júzinde jumys istemegen alty qyzmetkerdi tabelge engizip, shamamen 29 mln teńge jymqyrǵan.
Sondai-aq, direktor 501 oqýshyǵa zańda qarastyrylmaǵan oqý aqysy jeńildigin berip, mektepke 183 mln teńge shyǵyn keltirgen. Budan bólek, 0-synyptardy uiymdastyryp, ata-analardan túsken qarjyny esepke qospaǵan. Osy epizod boiynsha 305 mln teńge iemdenilgeni anyqtalǵan. Jazǵy lager qarajaty men sheteldik muǵalimderdiń jalaqysyna qatysty zańsyz áreketter de tirkelgen. Jalpy keltirilgen shyǵyn kólemi júzdegen million teńgege jetken.
Sot S.-ny 8 jylǵa, A.-ny 7 jylǵa bas bostandyǵynan aiyrdy. Aiyptalýshylardyń múlki tárkilendi. A.-nyń kámeletke tolmaǵan balalary bolýyna bailanysty jazany óteý bir jylǵa keiingi qaldyryldy.
588 mln teńge kólemindegi azamattyq talap qanaǵattandyryldy. Úkim zańdy kúshine engen joq.
