Májilis depýtaty Jigýli Dairabaev aýylda jaǵdai joqtyǵynan halyq jappai qalaǵa kóship jatqanyn aitty, dep habarlaidy Dalanews.kz.
Depýtattyń sózinshe, qazirgi tańda elimizde 6 147 aýyl bar, keiingi 5 jylda 194 aýyl jabylǵan.
"1342 aýylda aýyz sý, jol, elektr, jylý, meditsina, internet máseleleri áli de sheshimin tappaǵan. Mundai aýyldarda qalai sapaly ómir súrýge bolady? Aýyl halqynyń 33%-y ǵana ózin-ózi jumyspen qamtyǵan, tabysy turaqsyz, erteńgi kúnge senimderi az", - dedi ol.
Dairabaevtyń aitýynsha, eń qatty alańdatatyn jaǵdai - shekaradaǵy 1383 aýyldyń turmys tirshiligi.
"Bul aýyldarda jyldan jylǵa halyq sany azaiyp, shekaramyz adamsyz qala ma degen qaýip te joq emes. Osy oraida ishki migratsiianyń kúrt artýy da keleńsiz jaǵdai týǵyzyp otyr, byltyr aýyldan qalaǵa 118 myń adam kóship kelgen. Bul – shamamen 30 myń otbasy degen sóz. Bularǵa mamandyq, jumys, úi, mektep, balabaqsha – bári biýdjetten bólinýi qajet. ...Aýyldaǵy jaǵdaidy búgin sheshpesek, qalalarǵa shamadan tys júkteme túsedi, jumyssyzdyq, qylmys, áleýmettik shielenis artady", - dedi depýtat.
