Jún men terini qashanǵy otqa jaǵamyz
Mal sharýashylyǵymen ainalysatyn Atyǵai Bekqulov qoilaryn jylyna eki ret qyrqatynyn aitady. Óitkeni, tazalyq maldyń ósýine durys. Alaida onyń ekinshi qiyndyq týdyratyn jaǵy bar. Taý bolyp úiilgen qoi júnin órteýden basqa amal joq eken. Suranystyń azaiýýynan jekelegen shopandar shyǵynnan qashyp, qoidy qyrqýdy da azaitqan. Al bul jaǵdai maldyń túrli aýrýǵa shaldyǵýyna ákeletini belgili.
– Qoidyń júnin qyrqamyz. Qyrqamyz da, ony úiilip turǵan jerinen tamaq istegende otynmen arasyna qosyp jaǵyp jiberemin. Esh jerde bul jún qabyldap jatqan adamdy kórmedim, – deidi sharýa Atyǵai Bekqulov.
Óz kezeginde taǵy bir sharýa qojalyǵynyń iesi Zyliha Ospanova: «Basshylardan suraitynymyz myna soiylǵan teri, odan keiin qyrqylǵan jún jerde qalyp jatyr. Sony alatyn, ótkizetin jer bolsa» dep nazyn aitty.
Suranystyń joqtyǵynan sharýalar ony órteýge májbúr ekendigin aýylsharýashylyǵyndaǵylar da biletin bolyp shyqty. Oblystaǵy 3 million 895 myń qoidyń 30 myńy ǵana biiazy júndi qoi. Suranys osyǵan ǵana bar. Al óndirilgen 7 361,8 tonna jún dalaǵa tastalady eken. Óz kezeginde
OQO Aýylsharýashylyq basqarmasynyń mal tuqymyn asyldandyrý bóliminiń bas mamany Oraztai Úsipbaev:
– Tek qana biiazy júndi qoilarǵa ǵana úkimet tarapynan sýbsidiia tólenedi. 95 tonna jún alynyp, 130 teńgeden 12 mln 350 myń teńge sharýalarǵa tólengen bolatyn, – dep jaýap qatty.
Maldyń terisine keler bolsaq qoi júniniń sapasyna qarai eltirilik, tondyq jáne bylǵarylyq túrleri óndirilgeni belgili. Tondy aitpaǵannyń ózinde biiazy júndi teriden eltiri shapan, bas kiim, jaǵa tigilgen. Olardy tipti ań terilerine sáikestendirip boiap, ishik taǵy basqa baǵaly eltiri buiymdar jasaǵan.
Qazirgi bazar sórelerinde biiazy júndi qoidan tigilgen kiimder bar, biraq tek Qytaida shyǵarylǵanyn ǵana keziktiresiz.
– Tonnyń baǵasy 165 myń teńgege deiin jetedi. Tómendeý berýge de bolady. Qytaida shyǵarylǵan. Reseidiń ónimderi qazir joq. Qazaqstanda shyǵarylǵany tipti kezdespeidi.
Óńirde biiazy júndi eki ǵana zaýyt qabyldaidy. Onyń ózin de qajettilikke qarai alady eken. Buryndary kelisi úsh júz teńgege de jetpegen jún baǵasy biyl ǵana alty júzge ázer kóterilipti. Óńirde óte kóp sanalatyn qoidyń qazaqy túrine degen suranys ázirge bolmai tur.
Erlan QÝANDYQOV, Erjan SEIDÁZIMOV
